“Eus cumprendiu ca custu est unu processu politigu. S’Ungheria est fendu de totu po umperai figlia mia po is interessus insoru e po custu abbisongiat craramenti liberai Ilaria de custa manera de faiti giustissia. Ma Ilaria est barrosa meda, a mei non arriolat, e bolit donai dimostratzioni ca non tenit peruna curpa. Deu creu ca tocat a agatai una manera de spostai su processu o in Italia o in Germania, in manera tali chi possat dimostrai de averas ca issa non c’intrat nudda cun totu is sciollorius chi dda incurpant”
Est su babbu de Ilaria Salis, Robertu a chistionai. Est de una bona pariga de mesis chi est portendu a innanti una cuntierra po sa figlia e girendu de una parti a s’atra s’Italia, po fairi connosciri su contu de sa figlia. Ilaria, a pustis cuindixi mesis de presoni in Budapest, aunia est imbucada cun sa curpa, po sa politzia ungheresa, de airi scutu dus nazistas chi manifestaiant inigui e totu, immoi s’agatat in dd’una domu in sa capitali ungheresa. Est de una cidigedda a is acapius foras de presoni, ma ancora non totu est acabbau po sa maista de trintanoi annus de arreiginis sardas.
“Ilaria – at aciuntu Robertu Salis chistionendu de sa figlia intru de un’atobiu in Bologna de Sinistra Italiana-Alleanza Verdi Sinistra, su partidu chi at candidau sa maista po sa torrada europea de s’otu e de su noi de làmpadas – est in saludi bona, giai s’intendit beni. Est cichendu de torrai a cuberai is fortzas in su corpus poita sa presonia est stetia tostada meda. Pensai ca a pustis fairi una pariga de scaleris ddi mancat su sulidu. Immoi – at acabbau de nai Robertu Salis – tocat a acabbai custa cuntierra e dda torrai a portai in Italia”. Sa bocia dda tenit sempiri in is manus s’Ungheria, iat essi cosa beni fata chi dda iat pigai in manus sonumancu s’Unioni Europea chi non s’Italia etotu.
Màuru Mura
Martis, su cuatru de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://europa.today.it/attualita/caso-salis-strasburgo-padre-processo-politico-domiciliari.html
