“Boleus serrai sa guerra”. Mancant dis pagas a su cumentzu de su 2025 chi at a portai, inderetura, prus de una nova in sa politiga de totu su mundu, a partiri de sa torrada de Donald Trump in sa Domu Arva. Ma est Vladimir Putin chi in custas oras parit chi bogliat ponni una mirada po s’annu nou e cicai de donai una solutzioni a unu de is nus chi abarrant prus diligus: cussu de sa guerra in Ucraina chi andat a innantis de su mesi de friargiu de su 2022. Candu sa Russia, po cumandu de su matessi Putin, at invadiu s’Ucraina.
Cuasi tres annus a pustis e cun mortus de contai in numuru spantosu, su Presidenti de sa Russia at nau ca immoi Mosca bolit acabbai sa guerra. Giumpendu aici, sonumancu cun is fueddus, sa pensada de Donald Trump chi bolit feti cungelai.
Po ponni su fueddu acabbu a sa guerra, Putin fait finas su nomini de unu logu aunia s’atobiai: sa Slovachia, ghiada de su premier Robert Fico, su cali in is dis passadas at atobiau su presidenti russu in su Cremlinu, finas chi custu atobiu est stetiu criticau de Natzionis medas, a innantis de totu de sa UE. Fico, a dogna manera, at nau ca est a disponimentu po un’atobiu intru de is partis de si fairi in Slovachia. Su matessi Putin, arrespundendu a is preguntas de is giornalistas at fatu sciri ca dd’andat beni meda.
In is dis passadas su presidenti ucrainu Voldymyr Zelensky, de parti sua, iat assegurau ca “s’Ucraina est fendu totu cussu chi podit poita su 2025 diventit un’annu de pagi giusta, e chi addurit po tempus meda, po sa Natzioni nosta e po totu s’orrestu de su mundu”.
A innantis de is fueddus de Putin funt lompius cussus de su ministru de is Esterus Serghei Lavrov: “A dd’acabbai de sparai in Ucraina, immoi, non iat a portai a nudda, in su mentris chi abbisongiant acordius serius”, at nau su ministru. Chi, a dogna manera at fatu finas sciri ca una ciciarrada dun s’aministratzioni de Trump si depat amaroglia fairi.
Màuru Mura
Cenarba, su bintiseti de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.repubblica.it/esteri/2024/12/30/news/putin_25_anni_potere_stalin-423912743/
