Sa dì a pustis est unu cumentzamentu nou. De s’orrestu, de su palcu a suta de is fentanas de su Consigliu Regionali, sa Genti de Pratobello, ddu at torrau a nai in manera crara: “Chi nemus at a tenni contu de sa volontadi de is sardus, amostada cun prus de duxentumila nominis, eus torrai a nosi fairi intendiri”. Cun custu, nemus, s’atra dì in s’orruga de Roma, teniat sa pensada de orrovinai una festa chi at postu paris sa parti manna de is sardus. Po dda nai cun is fueddus de Luisu Pisci, de su comitau de su Sarcidanu, chi est una de is animas po sa lei “Pratobello 24”, “s’arregorta de nomini at postu paris genti de un’ala e de s’atra chi mancu is dus partidus prus mannus ant erriciu in s’urtima torrada eletorali”.
Ma, immoi, sa Genti de sa Pratobello no escludit nudda. Nemancu, duncas, su pesamentu de atrus morrungius: “Manifestadas noas? Non si tiraus a palas: in pissu de sa volontadi de is sardus non torraus a coa”.
Eris sa governadora Alissandra Todde est stetia crara: sa politiga podit finas ascurtai e castiai sa volontadi de is citadinus, ma chini fait is lei funt stetius sceberaus de sa genti craramenti. Ma, s’agatat genti, comenti s’abogau Micheli Zuddas, a intru de is comitaus de sa Pratobello 24 de su cumentzu, chi narat: “Una lei de cumentzamentu popolari non est s’arresurtau de unu arriolu, narat, est invecias unu strumentu de demogratzia. Sa Presidenti tenit su doveri, giai istitutzionali e giai politigu de arrespundiri a chini, in custa manera manna, s’est amostau po 210 mila bias. Sa Lei chi seus ponendu in atentzioni abbisongiat de unu caminu a sa lestra in Consigliu Regionali. Su nostru no est un’arriolu, ma una pretesa chi castiat a unu movimentu chi mai si ndi fut pesau de aici. Is istitutzionis depint fairi su doveri insoru e sighiri sa volontadi popolari chi s’est amostada craramenti”.
Màuru Mura
Cenarba, su cuatru de Santu Antine de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.italiachecambia.org/2024/09/legge-di-pratobello-24-sardegna/
