Nova bona e chi donat spera cussa chi lompit de Budapest. Su tribunali ungheresu at donau cumandu de fairi bessiri de presoni a Ilaria Salis chi, a dogna manera, abarrat a is acapius in domu. S’arrecursu fut stetiu presentau de is abogaus de Ilaria Salis e andaiat contras sa decisioni de su giuigi Jozsef Sos chi s’atra bia no iat donau su permissu de essida de presoni né po abarrai in Ungheria e nemancu po torrai in Italia.
Invecias eris su giuigi at donau su permissu e duncas sa maista de trintanoi annus de arreiginis sardas, candidada cun Avs a is Europeas benientis, at a podiri lassai su presoni de Budapest aunia si ddue agatat de prus de cuindixi mesis cun sa curpa de airi scutu una pariga de nazistas.
Su cumandu de su giuigi s’at a amostai candu at essi pagada sa cautzioni de corantamila eurus. Allirgu meda s’abogau Gyorgy Magyar: “Est una vitoria manna, Ilaria non s’at a fuiri. Immoi sa spera est chi sa familia paghit su dinari coidendu”.
“Ilaria est cuntenta meda de bessiri de presoni e nosu galu de prus ca aici dda podeus imbrassai”, is fueddus de Robertu Salis, su babbu de sa maista. “No est ancora a foras de su totu – at aciuntu sempiri Salis – ma at essi bellu meda a dda imbrassai a pustis cuindixi mesis, ma finas a candu s’at a agatai sempiri in Ungheria deu no abarru trancuillu”.
Finas su ministru de sa Giustitzia de s’Italia at fatu connosciri s’allirghia sua: “Ia bolli fairi connosciri sa cuntentesa po sa nova chi eus erriciu po cantu pertocat is acapius in domu po Ilaria Salis”.
Su cumandu de su giuigi, intru de atru, podit agiudai finas su caminu de una torrada de Ilaria in Italia. E po custu iat a tocai a is autoridadis italianas de aprontai is paperis de presentai a is autoridadis ungheresas. Est su caminu de sighiri finas donendu una mirada a sa lei de su Consigliu europeu de su 2009.
Màuru Mura
Giobia, su seigi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.open.online/2024/04/19/ilaria-salis-candidata-avs-elezioni-europee/
