S’est amostau setziu de una vetura chi portat is mortus, e ddu at fatu in is social, po nai sa sua in pissu de is votatzionis de s’Assemblea de is scritus a su Movimentu 5 steddas. Chini? Est Bepe Grillo a s’amostai in dd’unu videu carrigau, dapoi, in sa retza: “Bosi fueddu de garanti e scusorgiu de is valoris de su M5S. Valoris chi non s’agatant prus de is urtimus tres annus. Totu is pensadas chi mandaia a su Magu de Oz non funt mai stetius pigaus in cunsideru. Non s’est fatu prus agatai de mei”. Su videu, lamau in sa retza “Soi otimista”, est stetiu carrigau in sa pagina Facebook. Su Magu de Oz de su cali fueddat est Giusepu Conte. “Is valoris funt stetius traigius”, aciungit. Dapoi, chistionat a is eletoris: “Ant votau nemancu sa metadi de is scritus, ma bosi pongiu una duda. Eis giai decidiu e deu apu giai perdiu, ddu sciu. Ma soi otimista poita custu Movimentu teniat una identidadi de spantu”.
Chistionendu de Conte, at aciuntu: “Sa manera de fairi de Oz est stetia cussa chi est serbia po sciasciai su Movimentu in sa sua identidadi. Conte sunfrit de una maladia maniacali de s’arrepitiri a sprigu. Mi fait mali a biri su simbulu de su Movimentu in manus de custa genti. Cussu chi fut a intru no est ancora mortu”.
“Nosu – sighit a nai Grillo – seus cussus chi aspetiaus de essiri. Ci seus. Tengiu una pensada chi bosi scoviu a pustis. Ma non acabbat aici. Andai a votai, chi nde chi nò bagei a cicai cardulinu. Deu miga c’abarru mali, non bosi connosciu nemancu prus. Ma cicai de pensai ca custu Movimentu a tenni un’atru caminu, chi si siais bosatrus o nou”. Grillo donat finas is numurus de su Movimentu, chi: “est calau de su 25% a nemancu sa metadi. E m’incurpant de esseri su meri. Deu e Casaleggio no eus mai tentu perunu titulu po fairi su ministru o atru. E dapoi su M5S s’est mudau in dd’unu partideddu progressista, cun custus gioghigeddus chi non faiat mancu sa Democratzia Cristiana”.
Màuru Mura
Giobia, su cincu de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://mediasetinfinity.mediaset.it/video/mattinocinquenews/grillo-sul-carro-funebre-il-movimento-5-stelle-e-morto_F313480301068C08
