Tomasu Foti est su ministru nou de is Afairis Europeus, su Sud, is politigas de Coesioni e su Pnrr. Ddu diventat a pustis de Arrafiaeli Fitto, chi in is dis de sa cida passada fut in Casteddu po ponni sa firma in pissu de s’Acordiu de svilupu e Coesioni intru de su Guvernu e sa Regioni Sardigna e s’est dimitiu a pustis ca ddu ant postu comenti de vicepresidenti de su “Esecutivo della Commissione Europea”.
Sergiu Mattarella, su presidenti de sa Republica, a pustis airi erriciu sa presidenti de su Guvernu Giorgia Meloni, at postu sa firma in su paperi aunia Foti benit fatu ministru.
Foti, chi fut su caputruma de is Fradis de s’Italia in sa Camera, at giurau in faci a Mattarella, in su Quirinali, a mesudi e unu cuartu de eriseru.
“Tomasu est unu politigu de esperientzia manna e matessis capassidadis. Una de is prendas prus craras chi tenit Fradis de s’Italia in custu tempus. Tenit una carriera longa intru de su Parlamentu e de caputruma at scipiu amostai, in custa legisladura, totu cussu chi balit. E finas is cumpetentzias chi tenit, ca at ghiau su primu partidu de magiorantzia in Montecitorio”, at nau Giorgia Meloni chistionendu de su ministru nou. Aciungendu, dapoi: “Seus allirgus e ddi feus is augurius, giai deu e giai totu s’orrestu de su Guvernu”.
In segus, sa matessi presidenti, at acabbau aici: “Foti est unu militanti chi trabbagliat cun passioni manna e coerentzia e giai de piciocu at intregau sa vida sua po sa comunidadi sua e po s’Italia. Su ministru nou ndi boddit s’eredidadi de Arrafiaeli Fitto, chi est diventau su numuru dus de su ‘Esecutivo de sa Commisioni Europea’ e soi segura ca at a sciri trabbagliai beni meda umperendu is cumpetentias chi at giai amostau”. Totu po su beni de s’Italia e de is italianus”.
Foti est de tempus meda chi fait politiga e de sempri cun sa dresta: de su MSI a Alleantzia Natzionali. Est stetiu parlamentari de su 1996 a su 2013 e de su 2018 a oi.
Màuru Mura
Martis, su tres de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://roma.corriere.it/notizie/politica/23_aprile_28/chi-e-tommaso-foti-cosa-detto-perche-infuriare-dem-a40b00bd-1bb1-407b-ac1d-c9060794exlk.shtml
