Giuanni Luca Lapadula no at ancora cuberau de su corpus, a sa parti manca, chi at pigau in sa partida de cenarba passada, binta po 1-0, cun s’Hellas Verona. S’atacanti, italianu cun arreiginis peruvianas, eriseru, in s’allenamentu in Asseminello, at trabbagliau de una parti poita su dolu non fut ancora passau in totu. Intru de oi e de cras s’at a cumprendiri chi Davidi Nicola ddu at a podiri tenni a disponimentu po sa partida de dominigu, a mesudì e mesu, in domu de sa Fiorentina.
Eris, a dogna manera, in su centru Crai Sport Center, s’orrestu de sa truma at trabbagliau cun sa conca a sa partida de Firentze, chi s’atra dì est stetia stupada de sa Coppa Italia, a pustis is rigoris, de s’Empoli. A su cumentzu is piciocus de Nicola ant fatu esercitzius po su corpus e dapoi, su matessi allenadori casteddaiu, at chistionau de sa manera de giogai contras de sa scuadra de Palladino. Is giogadoris, in trumas piticas, ant provau situatzionis chi si podint agatai in campu. A serrai s’allenamentu una pariga de partiteddas a campu piticu.
In su fratempus sa Lega de sa Serie A at premiau su gol de Grabieli Zappa contras de su Milan comenti de cussu prus bellu de totu su mesi de Sant’Andria passau. At bintu Zappa lassendusì a is palas su gol de Hakan Calhanoglu de s’Inter contras de su Napoli.
Zappa, aici, diventat su giogadori de cuatru chi bincit su Iliad Goal of the Month, chi est su nomini de su premiu, in custu campionau. A innantis de Zappa iant bintu Barella, de s’Inter, in su mesi de austu po su gol fatu contras de s’Atalanta, su difensori de su Torinu Saul Coco in su mesi de cabidanni, po su gol fatu contras de sa Latzio e su giogadori de mesucampu de su Como Luca Mazzitelli in su mesi de talamini po su gol fatu sempiri contras de sa Latzio.
Su premiu s’agatat de su 2021-2022 e feti un’atru giogadori de su Casteddu ddu iat bintu: Keita Baldé po su gol fatu in su mesi de Sant’Andria de su 2021 contras de su Sassuolo.
Màuru Mura
Cenarba, su ses de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=IYFEDHoIgGw
