Est suta indagu po no airi agiudau a Satnam Singh, su massaju indianu mortu a sighiri un’incidenti in su trabbagliu in su sartu ponentinu, sa femina chi trabbagliaiat in sa matessi azienda agricola. Sa testimongia manna est stetia ascurtada eriseru a mengianu in su tribunali de Latina, in denanti de su Gip Giusepi Cario po chistionai de cantu sussediu in su meigama de su dixiaseti de làmpadas passau. A pustis airi arrespustu a is preguntas de Cario etotu sa femina est stetia scrita in su registru de is indagaus po no airi sucurriu su massaju indianu.
Po s’abogau de parti civili, Giuanni Lauretti, “calencuna cosa est stetia contada in atra manera, finas chi is contus funt cussus: non ci podit essiri contu diversu. Oi sa femina, intendia de su Gip comenti de indagada, at chistionau: non scieus po cali curpa, ma totu lassat pensai ca no at sucurriu a Satnam, ca issa e totu s’agataiat in su logu aunia totu est sussediu”.
Sa trabbagliadora est stetia intendia in presentzia de s’abogau cosa sua, a pustis ca a innantis iat decidiu de non esseri ascurtada de is abogaus de Lovato, po cantu nau de Lauretti poita iat airi “intendiu de tenni in pissu is ogus de s’ambienti de trabbagliu e po custu non boliat nai nudda a is abogaus de sa difesa”. Is abogaus de Antoneddu Lovato, chi est in presoni cun sa curpa de airi bòciu a Singh e in prus a ddu airi lassau in denanti de domu sua cun dd’unu brassu truncau, narant ca is fueddus de sa testimongia manna funt s’imbessi de cussu chi at nau sa pobidda de su massaju indianu.
Po cantu nau de sa matessi trabbagliadora, Satnam non iat airi perciu sanguni de su brassu, ma de sa buca e in prus su matessi massaju iat airi tocau a sa sola sa machina po imboddiai sa prastica chi, a pustis pagu, dd’at truncau su brassu in su mentris chi Lovato ddi naraiat de non ddu tocai. Infinis, sa testimongia, at aciuntu ca sa pobidda de Satnam e totu iat airi pediu de essiri acumpangiada a domu paris a su pobiddu.
Màuru Mura
Mercuris, su binticincu de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://roma.corriere.it/notizie/cronaca/24_settembre_24/satnam-singh-la-supertestimone-difende-il-datore-di-lavoro-antonello-lovato-fu-la-moglie-a-chiedere-di-portarlo-a-casa-875164f3-7cf0-4c5a-9465-d33ffaf0cxlk.shtml
