Est su disacatu a pustis chi unu comitau gadduresu contras de sa speculatzionis energetica in Sardigna at publicau nominis e facis de is consiglieris regionalis de su Campu largu chi ant votau contras de su caminu urgenti po chistionai de sa Lei de Pratobello chi iat airi impediu si passai sa bocia de una parti a s’atra in is cumissionis.
“Custa decisioni est stetia pigada de totu s’inteti de sa magiorantzia, chi est su paris de su Partidu Democratigu, is Steddaus, Alleantzia Birdis-Manca, Orizonti Cumunu, Progressistas, Unius po Alissandra Todde e Manca benienti. E duncas, totu is capus truma, est a nai Robertu Deriu, Micheli Ciusa, Maria Laura Orrù, Sandru Porcu, Franciscu Agus, Serbastian Cocco, Luca Pizzuto, funt totus de acordiu”, si ligit in su paperi de su Campu Largu. Paperi chi sighit nendu: “Totu s’orrestu, comenti cussu de umperai atru po amelessai at essi postu a un’ala de sa coalitzioni chi est su paris de fortzas politigase personis chi bolint trbagliai cun seriedadi po chistionis de importu po sa Sardigna”.
Su presidenti de su Consigliu Regionali Pieru Comandini cumbidat a totus de abasciai is bogis: “Is regulas ci funt e andant sighias. In democratzia tocat a ddas sighiri finas chi a bias non s’est de acordiu. Dipragit po is polemicas po sa chistioni chi in custu Consigliu Regionali si sigant is regulas a garantzia de totu su populu sardu”.
Po Comandini is dificultadis si giumpant cun s’arrespetu giai de is pensadas e giai de sa cara de totus: “Chini umperat fueddus grais, chini amelessat e chini cicat cu sa prepotentzia de ponni fogu in sa genti est sempiri de ponni a un’ala”.
In custa chistioni narat sa sua finas sa Cgil: “In su dibatitu democratigu non ci podit essiri logu po amelessus e fueddus fortis contras de is consiglieris regionalis. E a Maria Laura Orrù, Luca Pizauto, Sandru Porcu, Serbastian Cocco e Micheli Ciusa andat totu sa solidariedadi nosta”.
Màuru Mura
Lunis, su bintotu de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.cagliaripad.it/608845/consiglio-regionale-chiusa-oggi-la-legislatura-aula-semi-deserta/
