Su Casteddu poderat beni e si dda giogat, ma non est bastanti po non perdiri cun s’Atalanta. Sa scuadra de Gasperini bincit po 0-1 cun dd’unu gol de Zaniolo, ma finas cun cuatru paradas spantosas de Carnesecchi. Po is atalantinus est sa partida de dexi binta de sighiu e cun custus tres puntus si poderat sa conca de sa classifica de Serie A.
Sa prima mesoredda est chena emotzionis. Dapoi unu morrungiu de sa scuadra de Nicola a su minutu de 33: Deiola imbucat in area de sa parti dereta, sa bocia andat a acabbai in su brassu de Kossounou, ma po s’arbitru e is ominis de su Var est totu in regula. Intru de su minutu de 39 e de 40 Carnesecchi fait duas paradas spantosas: a innantis pighendu unu tiru de Piccoli e dapoi, un’atru, de Zortea. E finas tres minutus a pusti firmat beni meda a Piccoli chi fut prontu a tirai bia sa porta.
Gasperini no est cuntentu meda e sa parti de duas dda cumentzat cun tres giogadoris nous: a intru Djimsiti, De Roon e Lookman e a foras Hien, Brescianini e Retegui. De Roon si pigat inderetura unu cartellinu grogu po una punta de pei a Luvumbo, chi abarrat a terra e non ce dda fait prus a giogai. Imbucat aici Felici.
A su minutu de 55 Ruggeri tirat a intru de s’area aunia Pasalic si nci papat su gol. Su Casteddu arrespundit cun dd’unu corpu de conca de Mina in su mentris chi Sherri parat beni unu tiru de Kossounou.
A su minutu de 64 Gasperini acabbat is mudamentus e aici imbucant in campu Samardžić cun Zaniolo. Su matessi Zniolo a sa prima bocia tocada fait su gol chi permitit a s’Atalanta de binciri. Si cuntentat tropu su giogadori de s’Atalanta e s’arbitru dd’amostat su cartellinu grogu.
Nicola, tandu, fait imbucai Pavoletti cun Marin e fait bessiri Zortea e Mokoumbou. Carnesecchi fait un’atra grandu parada e sa partida acabbat cun sa vitoria de s’Atalanta.
Màuru Mura
Dominigu, su cuindixi de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=CxuwOuX5S-8
