Genti chi imbucat po sa bia de unu e atra genti, invecias, chi est giai esperta. Po totu is consiglieris, su cumentzu de sa bia de tres de Massimu Zedda comenti de sindigu est unu puntu de partentzia e portat emotzionis.
A is cincu de eris a merì in Palatzu Bacaredda est comenti sa prima dì de scola. Giachigeddas, cravatas e tasca: miraideddus is consiglieris comunalis chi cumentzanta a pigai cunfidantzia cun is cadiras e is bancus de su Cumunu de Casteddu. A su batiari no est bofia mancai nemancu sa presidenti de sa Regioni Alissandra Todde: “Soi de averas cuntenta de m’agatai innoi. Massimu Zedda est unu sindigu chi eus bofiu in manera crara e forti e paris a sa Regioni eus a trabbagliai po su beni d sa citadi de Casteddu”.
Cun su giuramentu de Zedda cumentzat un’atru tempus po sa capitali sarda e su sindigu amostat e fait connosciri finas is assessoris nous, cincu feminas e cuatr’ominis, calencunu giai connotu, ma atrus novidadis
Maria Cristina Mancini, Luisa Giua Marassi, Maria Francisca Chiappe, Giulia Andreozzi, Carrulu Serra, Mateu Lecis Cocco Ortu, Anna Puddu, Giusepu Macciotta, Yuri Marcialis. Custus funt is noi assessoris nous de sa Giunta de Zedda.
Invecias is consiglieris nous chi ant pigau su postu de cussus fatus assessoris funt Barbara Serra de su Partidu Democratigu, Lucianu Congiu de is Steddaus, Corradu Sorrentino de Alleantzia Birdis Orrubius e Carrulu Usai de is Progressistas.
In su sighimentu de is trabbaglius in su centrumanca si ndi funt pesaus inderetura problemas po su sceberu de su presidenti de su consigliu comunali. A ghiai is trabbaglius de su cumentzu est stetiu su consiglieri antzianu, su democratigu Marcu Benucci, chi est cussu chi at pigau prus votus intru sa magiorantzia, ma c’est un’atru candidau, Mateu Massa de su partidu de is Progressistas. Is acordius pigaus intru de is ecuilibrius de is partidus ant lassau calencunu morrungiu e su primu consigliu est stetiu suspendiu.
Màuru Mura
Martis, su noi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Palazzo_Civico_%28Cagliari%29
