Est tempus de medaglias e de premius, de cussus de pnni in foras de sa janna de is ristorantis e osterias. Aspetendu su 5 de su mesi ch’intrat, candu in Modena s’ant a scoviai is steddas noas de sa Michelin, eris fut sa di de su “Gambero Rosso” de sa Ghia Ristorantis 2025 che at amostau in su Tiatru Eliseo de Roma is 2425 logus bisitaus de sa ghia.

A su costau de is nominis prus famaus, est a nai cussus chi oberint is pensadas intru de sa ristoratzioni manna, cun Niko Romito e su Ristorante Reale cosa sua in Castel di Sangro, in sa provincia de S’Aquila, e cun Erricu Crippa e su Piazza Duomo in Alba, in su coru de su tartufu, s’agatat finas una lista longa de ristorantis sardus, po testimonia de comenti sa traditzioni de s’Isula tenit un’indicu culturali e non feti turisticu. Funt setanta, difatis, is ristorantis chi s’agatant a intru, cun giai seixi imbucamentus nous. Prus che a totu funt cussus chi s’agatant in Casteddu.

Dus funt is nominis chi si stagliant prus de totu cun is Tre Garmberi donaus: Arieddas in Marmilla, primu esempiu in Sardigna (sa proprieddi est de Su ‘Entu) a ponni unu ristoranti a intru de unu mangansinu de binu, e Osteria Abbamelie, in Barbagia, aunia su “chef” Mauru Ladu amostat sa pensada sua de cogina territoriali imbesturada de tecnicas de oi. “Is Tre Gamberi funti meda de averas po nosu”, at nau cumoviu Frainciscu Vitale, “chef” de Arieddas, “nosi cumbidat a s’impegnai ancora de prus in cussu caminu chi eus decidiu de sighiri giai de su cumentzu. Donat valori a su trabbagliu de dogna di de totu sa filera, massimamenti de cussus chi nosi bendint sa cosa ca aici ce dda feus a contai sa Marmilla in sa mesa. Est gratzias a issus chi podeus donai lugi a unu territoriu chi minescit de essiri contau e seus cuntentus meda de totu custu scambiu culturali”.

 

Màuru Mura

 

 

 

Martis, su bintidus de mesi de talamini de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://primacuneo.it/attualita/guida-2024-del-gambero-rosso-il-cuneese-domina-nettamente/