Pretzius artus totu paris de is carburantis e de sa pasta, chi po custa si funt pesaus de cuasi su dopiu in in us urtimas dexi dis. Poita? Curpa de sa guerra in Ucraina, chi est portendu in artu totu cussu chi si depit comporai po biviri? Farra e simbula massimamenti o calencunu, invecias, est pighendudedda comenti de scusa po si fairi prus dinari a is palas de is sardus?

Po cicai de ddu cumprendiri sa Procura de sa Republica de Casteddu at obertu un’indagu donau in manus a is procuradoris Danieli Caria, Erricu Lussu e Maria Virginia Boi. Sa decisioni est pigada de Pàulu De Angelis, chi po imoi non tenit né nominis e nemancu ideas de comenti incurpai.

At essi sa Guardia de Finanza de Casteddu chi imoi at a trabagliai po biri cussu chi est sussediu. Dus is pensamentus: is is fueddus de su ministru de sa “Transizione ecologica” in pissu de su pretziu de is carburantis e is numurus chi amostant sa capitali sarda comenti sa prus a innanti, in totu Italia, de su pretziu de sa pasta.

In su mentris is camionistas, chi portant s’orroba in dogna logu, sighint is morrungius, finas chi su ministru Patuanelli at fatu sciri chi calencuna cosa s’est decidendu po ddus tenni a su costau.

“Finas a candu non eus a biri, de averas, chi su carburanti non calat de pretziu, nosu sigheus a abarrai frimus”, ddu narat Danieli Fanni, unu de is “capus” de custu morrungiu.

A custa genti, chi est in disisperu e s’agatat cun is palas a muru, is fueddus de su ministru non funt serbius a nudda. “Su guvernu est pensendu de ndi tirai is tassas po su pretziu de is carburantis e deu creu chi non possiaus prus abarrai cun is manus in manus. Aici comenti iat a tocai a tenni atras pensadas non feti po s’Italia, ma finas po totu s’Europa”, is fueddus de Patuanelli. Chi at finas aciuntu: “Su decretu at essi de seguru prontu po custa cida. Su problema est feti cussu de agatai su dinari chi serbit po ddu fairi”.

 

 

16 de martzu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.procura.ca.it/