Una bidda ogliastrina, Ussassa, est de tres annus chena dotori e imoi cicat de si fairi intendiri de is politigus sardus poita aici non si podit andai a innantis. Candu totu s’Ogliastra at cumentzau sa segunda parti de su screening, is ussassesus, dinnanteriseru, giai si funt acostiaus a sa palestra de su cumunu, ma feti po morrungiai e po fairi intendiri sa propria bogi. In denanti de totus su sindigu de sa bidda Chicco Usai. Eriseru sa Assl de Lanusei at fatu sciri ca poita nisciunu dotori at donau sa disponibilidadi de erribai in Ussassa su bandu at abarrai obertu finas a candu calencunu s’at a presentai.
Giai po tres bortas is ussassesus iant fatu su tamponi: duas bortas po contu de su Cumunu e un’atra, invecias, de sa Regioni, ma lunis passau non c’ant bistu prus e, cun inchietu meda, no ant fatu nudda.
“Nos abarrat feti su morrungiu, at nau su sindigu, po nosi fairi ascurtai. Seus stancus meda de custus tres annus chena dotori, est unu diritu de totu sa genti e spereus chi serbat a calencuna cosa cusssu chi seus fendu. Est de su 2018 chi nosi narant ca at erribai su dotori, invecias ddu mandant feti po una pariga de mesis e a pustis seus in sa matessi situatzioni. Imoi, de su primu de gennargiu, non s’est fatu biri nemus e innoi erriscaus de nosi morri non de coronavirus, ma de cosas prus lebias. Sa genti de sa bidda est becia e po agatai unu dotori, su prus acanta, depeus andai a Seui, chi est atesu de cuindigi chilometrus. Genti meda non tenit sa machina e dogan borta is problemas funt medas. Seus aberu postus mali”.
“Teneus diritu – at sighiu a nai Usai – a unu dotori in bidda, comenti ddu tenint in Milano o in Roma, poita nosu puru pagaus is tassas. Fendu aici si donat prus fortza a sa genti chi si ndi bolit andai de is biddas e ddas bocint prus de cantu ant fatu finas a imoi. Custu de su dotori chi no erribat est feti s’urtimu de is problemas chi eus tentu: in sa scola teneus pipius de idadis diversas totu in d’una classi, sa posta erribat tres bortas a sa cida, sa banca est oberta feti duas bortas a sa cida. Nosi funt cumbidendu a nosi nd’andai, ma sa resistenzia dda tenus a intru e abarraus”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Renato d’Ascanio Ticca
