Sa Natzionali de fubal italiana torrat a giogai in Casteddu, comenti depiat fairi ocannu passau po festai is cent’annus de vida de sa scuadra de su Casteddu. Cussa partida chi si depiat giogai su 29 de maiu de su 2020 fut sartada po mori de sa pesta de su Covid e s’at giogai cenarba 28 de maiu. At essi sa Natzionali de San Marino a erribai in Sardigna po si dda biri cun is piciocus de Roberto Mancini in d’una partida chi at a serbiri po s’aprontai a is Europeus de fubal chi partint s’11 de làmpadas po acabai s’11 de mesi de orgiolas. Intru de is asulus ant agatai postu, cuasi de seguru su portieri de su Casteddu Alessio Cragno e dus sardus: su portieri de su Torino Sarbadori Sirigu e su casteddaiu de s’Inter Nicolò Barella.
Est de s’11 de cabidanni de su 2018 s’urtima borta chi una Natzionali italiana at giogau in sa capitali sarda, ddu iant fatu is piciocheddus de s’Under 21 contras de s’Albania: partida binta po 3-1 cun gol de Dimarco, Murgia e Parigini.
Tocat andai unu pagu prus addei cun is annus po arregodai s’urtima borta chi est benia sa scuadra de is mannus: su 9 de friargiu de su 2005, partida in amistade cun sa Russia. Cussa est partida de arregodus mannus ca iant giogau finas dus giogadoris de su Casteddu, Langella cun Esposito, ma, prus che a totu poita cussu merì totus ddu iant intregau a Gigi Riva, difatis de cussa borta su Casteddu nd’iat arretirau su numuru 11. De tandu, mai prus perunu giogadori at portau in is palas cussu numuru.
A innantis s’Italia iat giogau in Casteddu atras cuatru bortas: sa prima, duas dis prima de Paschigedda in su 1967, cun sa Svizzera iat bintu po 4-0 (dus gol de Domenghini, Mazzola e Riva) e sa partida baliat po si giogai is Europeus. In segus, su 20 de friargiu de su 1971, cun sa Spagna e in su mesi de idas de su 1989 cun s’Argentina de Maradona. S’urtima borta chi est erribada sa Natzionali est invecias su 14 de Santu Aine de su 1992: 2-2 cun sa Svizzera po una partida chi baliat po si giogai is mondialis in su 1994 in is Stadus Unidus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://primalariviera.it/cronaca/calcio-open-day-per-il-don-bosco-di-vallecrosia/
