No est passada chena fueddus sa bessida de su partidu Sardu de Atzioni de Cuiricu Sanna, chi cun Christian Solina comenti de Guvernadori de sa Regioni, est stetiu assessori a s’Urbanistica a innantis e capu de gabinetu dapoi. Su gadduresu si nd’est bessiu nendu ca su partidu “parit prus unu chi at traigiu chi non unu difensori de sa natzioni sarda, teneus unu segretariu chi no est bofiu beni de is sardus e finas de medas sardistas, unu presidenti de su partidu postu de unu cungressu chi pariat una brulla”.
Sa prima arrespusta est lompia de su matessi segretariu natzionali Solinas. In is social at amostau is copertinas de dus libburus: “I miserabili” e “Gli ingrati”. At essi una coincidentzia? Sanna at chistionau un’atra borta: “Apu sighiu is fueddus de unu amigu de tempus meda e apu torrau a ligiri su libru de Victor Hugo, i Miserabili, chi est su contu de unu brav’omini chi benit traigiu de is amigus”.
Acabbada aici? Mancu po nudda. Poita, in segus, at chistionau chini in su partidu si ddu est agatau, ma est a pustis passau in Alleanza Sardegna, Giuanni Satta chi at chistionau de Curicu Sanna comenti de “unu chena né arti né parti. Chi candu est diventau assessori s’est cretiu chissà echini intreghendusì a cenas, prangius e inauguratzionis, scriendu de sighi cadumentzias in Facebook, fendu totu e non is interessus de is sardus. Totu is atrus collegas ddu creiant s’assessori peus, bravu feti in is contus de errisu ma chi no nd’at intzertau una comenti de assessori”.
Is fueddus, a pustis, si faint sempiri prus grais: “Totu cussus chi ddu connoscint scint cantu non siat capassu e traitori”, sighit Satta in is social, “immoi si arrebellat a Solinas, finas chi finas a tempus pagu si bantaiat de s’amistade sua. Cussu Solinas chi a unu ‘nemus’ at permitiu de fairi po cuatr’annus s’assessori e po un’annu su capu de gabinetu. Pagau beni meda finas chi non acabbaiat nudda, non si podiat castiai e cumpartziat totus”.
Màuru Mura
Sabudu su degi de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Partito_Sardo_d%27Azione
