“Is scentziaus de su Cts nosi pedint de ponni mesuras prus tostadas e deu pensu chi siat giustu. De parti nosta depeus cicai de ligiri beni, cun atentzioni manna, is numurus de custas dies, e biri ita podeus fairi po biviri custas cidas chi erribant, chi, tocat a ddu nai, non funt facilis po nudda”.

Su ministru de sa Saludi, Roberto Speranza, sighit a nai ca no est ancora erribada s’ora de mollai is regulas po su Covid, ma narat puru ca tenit fidi po “is vacinus, chi funt un’atra borta in manus nostras”. “Seus po giumpai is ses milionis de vacinus fatus”, narat, cun cuntentesa, in sa trasmissioni “Accordi e Disaccordi”.

E in pissu de is mesuras chi funt po erribai ita pensat su Ministru? “Funt bideas chi eus cumentzau a castiai. Cenarba eus a ligiri is numurus e po is decisionis chi depeus pigai tocat a tenni numurus chi fueddint craru. A dolu mannu, in is urtimas cidas, eus tentu atras variantis, massimamenti cussa ingresa, chi est maladita e tenit una capassidadi de picigai de prus de su 35-40%. In Italia, finas chi non medissimas, funt erribadas is variantis brasilianas e sudafricana, e po mori de custu, su virus coitat de prus a picigai”. Sighit ancora donendu numurus su ministru: “S’impestamentu intru de sa genti chi trabagliat in sa sanidadi si funt abasciaus meda, po meritu de su vacinu. Eus vacinau unu milioni e mesu de personis chi tenint prus de otant’annus e, fut ora, si bit ca funt calendu is mortis chi tocaiant custa idadi : pensai ca ses mortus in pissu de degi, a innantis, funt de genti chi teniat otanta annus e passa. contasu de vacinai a totus, ca funt erribendu cincuanta milionis de vacinus”

“A totu nosu , acabat de nai su ministru, iat a pragiri a nai ca est totu acabau e ca de cras si torrat a oberri totu, ma chi torraus a oberri at essi peus meda e po custu est prus sabiu a provai a binciri”.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto: https://www.infermieristicamente.it/articolo/10893/e–roberto-speranza-il-nuovo-ministro-della-salute-ecco-chi-e/