Sabudu e dominigu atru cumpudu cun “Sardi e sicuri”
Sighit su cumpudu po is sardus cun is tamponis, chena de ddus pagai, de su progetu “Sardi e sicuri” de sa Regioni sarda e fatu de Ares-Ats po binciri sa pesta de su Covid-19. Cras, sabudu 13, e pusti, dominigu 14 su tamponi s’at a podiri fairi in atras dixianoi biddas de su Sud Sardegna: Ceraxius, Sestu, Pauli, Cuartuciu, Sètimu, Senobrì, Murasteni, Ussana, Guasila, Nuraminis, Samatzai, Seligas, Santu Asili de monti, Pramantellu, Sant’Andria, Barrali, Sueddi, Gomamajori e Ortacesus.
In otu de custas biddas, po mori ca sa genti est prus pagu, su tamponi at essi fatu feti in d’una dì. In Barrali, Seligas, Pramantellu e Gomamajori su sabudu e in Sant’Andria, Sueddi, Santu Asili de monti e Ortacesus su dominigu.
Su tamponi, est giustu a ddu arregodai sempiri, no est obligu, ma iat essi cosa bona e giusta a ddu fairi ca est un’agiudu po cicai de binciri custa pesta maladita. Ant essi in setixentus, dotoris, infermieris e tecnicus, cussus chi ant a trabagliai in custas duas dis, chena contai totu is volontarius chi agiudant po sighiri totu is mesuras.
Sa genti chi si bolit fairi cumpudai depit feti erribai cun sa tessera sanitaria a portada de manu de is otu de mengianu a sa una e de is duas de pusti prangiu a is ses. At a tocai a donai unu numuru de telefunu aunia, a pustis, at essi mandua unu sms cun s’indicu po castiai s’arresurtau. Calencunu cumunu, po non fairi erribai totu sa genti paris, at giai decidiu mesuras po dividiri sa genti.
Po imoi su “screening” de su progetu “Sardi e sicuri”, chi at essi fatu in totu sa Sardigna, at trabagliau in cuatru zonas: in su nuoresu, in Ogliastra, in su Campidanu de mesu e in Casteddu. Centu e cuatru is cumunus e, prus o mancu, centuotantamila is personis chi ant decidiu de si fairi cumpudai. Spereus chi tra pagu tempus totu custu at essi feti un’arregodu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://comune.assemini.ca.it/articolo/sardi-sicuri-assemini-27-28-marzo-2021
