Est acabada sa maja de sa manu de Semplici? Custu est cussu chi si pregontant is tifosus de su Casteddu a pustis sa partida perdia de sabudu in La Spezia. In sa giorronada de bintotu de sa Serie A ant perdiu is urtimas cuatru scuadras de sa classifica (Crotone, Parma, Casteddu e Torinu), e imoi po is piciocus de Semplici sa classifica est unu prantu: si funt stesiadas Benevento e Spezia, atesu imoi de seti puntus. Non totu est perdiu ca su Torinu de Davidi Nicola est feti a unu puntu, finas chi tenit una partida de mancu, cussa, a dogna manera, dificili meda cun sa Lazio. Comenti narat Semplici non tocat a castiai is arresurtaus de is atrus ma tocat a pensai feti a fairi puntus, nosi parit giustu custu cuncetu de s’allenadori toscanu. Cussu chi fait feli est sa vitoria de su Benevento cun sa Juventus de eriseru, nemus si dd’aspetaiat, ma su fubal est bellu propriu po custu: calencuna borta Davidi bincit cun Golia!

In La Spezia is sardus no ant giogau beni meda, ma no est mancada sa gana e sa barra e tocat finas e a nai ca sa partida dda iant finas paregiada a s’urtimu segundu de giogu, ma su Var custa borta at piscau unu giogadori de su Casteddu in fuorigioco de unu bidu de su pei. Trabagliu, trabagliu e ancora trabagliu, feti cun custa arretzeta si podit andia a innantis po non ci calai in serie B, mancant ancora dexi partidas e totu podis sussediri: trinta puntus funt medas de averas! Imoi su campionau si frimat po duas cidas e Semplici at a tenni su tempus po fairi intrai beni in conca is ideas suas a is giogadoris. Po imoi no at tentu pasu po nudda e eus a biri chi is giogadoris arrespundint beni, su materiali c’est e certus giogadoris non si ndi podint airi scaresciu comenti si giogat, ca ddu ant fatu sempiri beni.

Si torrat a giogai su sabudu a innantis de Pasca Manna, candu a su Sardegna Arena at erribai su Verona de Juric, chi a su campionau non tenit nudda de pediri.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://www.fantacalcio.it/serie-a/ultima-giornata/20_03_2021/spezia-cagliari-cronaca-tabellino-e-voti-del-fantacalcio-403079