Atra partida binta po sa natzionali de fubal italiana eriseru, sempiri in Roma e sempiri po 3-0, custa borta contras de sa Svizzera. Est una scuadra chi est pragendu meda cussa de Robertu Mancini, non ddu est su grandu giogadori chi atras natzionali podint tenni, ma su trabagliu de totu is piciocus fait bisai sa genti apassionada. Dus gol de Locatelli e unu, candu sa partida fut acabendu, de Immobile ant permitiu a is asulus de tenni giai sa cualificatzioni in buciaca, dominigu, a is ses de merì cun su Galles, s’at a decidiri chi comenti de primus in classifica o chi nde chi no comenti de segundus.

A pustis airi bidu totu is atras scuadras si podit nai ca custus Europeus ddus podit perdiri feti sa Francia chi est parta de averas sa prus forti cun giogadoris che Mbappé, Pogba o Kanté chi faint sa diferentzia. Ma est a nai ca a palas de is fradilis de s’atra parti de is Alpi, ddue funt finas is piciocus de Mancini. Atras scuadras chi funt partas fortis funt su Belgiu de Lukaku e Mertens, po abarrai cun is giogadoris chi giogant in Italia e totu, s’Olanda de Wijnaldum e, comenti de sempiri, sa Germania de Thomas Muller. Po nosu ant essi custas is scuadras chi s’ant giogai sa vitoria. Prus addei s’agatant is scuadras de sa Spagna e de s’Inghilterra, chi tenint giogadoris fortis, ma ddis mancat calencuna cosa.

Est spassiendu s’Italia e non si scaresciaus dde aunia funt erribaus: chena mondiali tres annus a imoi e cun is atrus dus mondialis chi iant fatu erriri totu su mundu.

Mancini est arrennescendu aunia pariat chi is atrus invecias iant faddiu: puntai in is ominis a innanti de is giogadoris. Custa est una truma chi est fendu beni e podit fairi ancora meglius, giai funt pagu cosa sa Turchia e sa Svizzera, ma a s’Italia funt aberu pagas is scuadras chi ddus possant ponni a suta.

 

 

 

Màuru Mura

 

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

 

Foto: https://www.chicchecalcio.it/italia-svizzera-3-0-gol-highlights-e-sintesi-video-youtube/