Su Covid non dd’acabat de donai strobu a is biddas sardas, custa borta at scioberau Seulu, bidda cun genti galana chi donat su nomini a una de is tres Barbagias de sa Sardigna. Torrat sa timoria, ca s’est agatau unu impestau ca, non sciendu nudda a innantis, at fatu festa paris a atras centutrinta personas.
“Eus dividiu chini fut a cussa festa in tres zonas de erriscu – at nau su sindigu Erricu Murgia. Si partit de sa genti chi est prus acanta a su impestau, comenti parentis o biginus de domu e si sighit cun cussus chi ant festau e non si funt acostiaus”. Est a nai ca chini s’at picigau su coronavirus fut unu chi at fatu su vacinu de dus su doxi de triulas passau, ma podit capitai. “Imoi – sighit a nai su sindigu – seus fendu cussu chi depeus e, cun s’agiudu de s’Ats, eus a controllai, sa spera est cussa chi su virus non apat impestau calencun’atru”. Po s’ora Murgia non at a fairi peruna ordinantzia e si sighint in Seulu puru is regulas chi at donau su Guvernu italianu. Su sindigu, a dogna manera cumbidat chini fut a sa festa de sighiri sa regula de abarrai in domu po dexi dis e de si ponni sa mascherina in is logus obertus. “Sa festa fut in d’unu logu mannu meda, teneus fiducia e seus bivendu in manera trancuilla totu custu contu”. Sa festa fut sabudu passau ma su impestau, chi non torraiat in Seulu de pariciu mesis, at cumprendiu ca calencuna cosa no andaiat de sa dì a pustis, e at decidiu inderetura de avertiri su sindigu.
Abarrat arta, a dogna manera, in sa terra nosta, s’atentzioni. Su bulletinu de eriseru, martis 3 de austu, naraiat de atrus 210 impestaus e sa percentuali cun in tamponis fatus de su 7,5%. A dolu mannu chistionat de unu mortu puru: una femina de norant’annus chi biviat in sa provincia de su Sud Sardegna.
Abarrat su matessi su numuru de cussus chi s’agatant in terapia intensiva e bessit de tres, invecias, cussu de chini est in is atrus aposentus.
Is 210 impestaus nous funt aici dividius in Sardigna: 98 in Casteddu, 61 in su Sud Sardigna, 22 in Nugoro, 16 in Aristanis e 13 in Tatari.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Archivio Domus de Janas
