In su mentris chi cuasi totu s’Italia s’agatat in zona bianca (is regionis chi funt ancora grogas ddu ant a diventai su 21 de lampadas, foras de sa Valle d’Aosta chi depit aspetai su 28) e sa vida de totus est mudendu in meglius, c’est una bidda in su centru de sa Sardigna chi de su cumentzu de su mesi de làmpadas est in zona orrubia: Aritzo. Sa bidda de sa Barbagia de Brebì est frima e ddu depit abarrai  sonumancu po atras dexi dis, difatis non calant de meda is impestaus e sa cosa sola chi si possat fairi est cussa de sighiri totu is regulas, abarrendu in domu e cichendu de no atobiai a nemus. Po imoi in Aritzo, chi est bivia de 1200 personis, funt una cincuantina cussus boddius de sa pesta e un’otantina, invecias, cussus incungiaus in domu.

Serradas totu is butegas foras de sa potecaria e is alimentaris e si podit bessiri de sa bidda feti po grandu bisongiu. Is butegheris cumentzant a morrungiai e s’atra dì si funt agataus po cicai de pediri mesuras prus moddis, comenti sa possibilidadi de portai s’orroba in domu agliena.

Su comissariu de su Cumunu, Antoni Monni, non ci indendit a cuss’origa: “Mancu si ndi fueddat, sa pesta est oguali a dexi dis a imoi, is numurus non funt calaus e non podeus fairi in atra manera, mi dispragit tropu”.

In su fratempus isnumurus de is impestaus sardus sighint a abarrai sempiri pagus, parit de essiri torraus a is mesis de martzu e arbili de ocannu passau, candu sa pesta fut pagu cosa. Is impestaus nous funt bintidus e mancu unu mortu. In setantatres s’agatant in is aposentus de is spidalis e sesi in is terapias intensivas. Is incungiaus in domu funt 11.788.

In totu, de friargiu de ocannu passau, eus tentu 57.061 impestaus e aici funt dividius in su territoriu: 14.935 in sa citadi metropolitana de Casteddu, 8.674 in sa provincia de su Sud Sardigna, 5.163 in cussa de Aristanis, 10.955 in provincia de Nugoro e 17.320 in provincia de Tatari.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto: https://www.borghiautenticiditalia.it/borgo/aritzo