Orgosolo de sempiri fut, paris a medas atras (Osilo, Arzana, Seui, Sedilo, Thiesi, feti po ndi nomenai calencuna) una de is biddas sardas in su coru de Pàulu Pillonca, giornalista, scritori e poeta chi si nd’est andau de custa terra in su mesi de maju de tres annus a imoi. In Orgosolo Pillonca ddu iat biviu candu fut pipiu, ca su babbu faiat su forestali in cussa bidda. De Orgosolo teniat is arregodus prus bellus, ca s’agataiat ancora sa mamma. Chini ddu at connotu in vida scit beni s’amori chi teniat po sa genti orgolesa e candu depiat andai a calencuna manifestada inigui, fut sempiri festa manna. Amistadis de annus e annus teniat cun totus, massimamenti, che sempiri, cun pastoris e massajus.

Unu rispetu, cussu de is orgolesus, cresciu ancora de prus candu Pillonca trabagliaiat in sa redatzioni de s’Unioni sarda de Nugoro: paginas nodidas e de coru cussas scritas po Orgosolo.

Imoi, po ddi rendiri s’onori chi minescit, sa bidda barbaricina ddi intregat una manifestada su 26, sabudu, de custu mesi, in s’Auditorium comunali de prassa de Su Multhinu a is dexi e mesu de mengianu e finas cun d’una direta in Facebook. S’atobiu est aprontau de su Sotziu Culturale Murales cun s’agiudu de su Cumunu de Orgosolo, sa Regioni de Sardigna e S’Unioni Folkloristica italiana.

Po chistionai ddu ant essi s’amigu de una vida Bachis Bandinu, un’atru amigu chi teniat in su coru comenti Atiliu Mastino, sa poetessa Anna Cristina Serra e su figliu Pieru Sandru chi dde su babbu nd’at tentu in eredidadi sa passioni e s’amori po is cantadoris e po sa bidda orgolesa. Gisella Vacca, ovoddesa chi est connota po is trabaglius galanus chi fait, at a recitai calencuna poesia e is cantadoris a bolu Brunu Agus, gairesu, e Nigola Farina, orgolesu, ant a cantai cun sabidoria calencuna otava.

Is orgolesus de su Tenore Murales ant acumpangiai is trabalius e dogna cosa at essi cumpartzia de Banne Sio, chi est su regista de totu custa manifestada.

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.