Crescit s’arriolu de su Covid in Aritzo, sa bidda barbaricina chi at torrau a serrai totu po is impestaus meda, mancari chi sa Sardigna est in zona arba.
Po s’ora funt, prus o mancu, una cincuantina in totu is impestaus in totu su territoriu comunali, e in prus in centu e dus s’agatant incungaius in domu. Su numuru si ndi pesat sempiri de prus candu crescint is tamponis chi benint fatus. Duas dis a oi su coumissariu de su Cumunu, Antoni Monni, s’est intendiu custrintu a donai cumandu de torrai in zona orrubia e cun prus fortza puru: serradas is scolas, aici comenti totu is butegas, is bar e is ristorantis, finas po ndi liai cosa de papai o de bufai. Non si podit mancu bessiri o intrai in sa bidda chi non po mori de trabagliu o urgentzias sanitarias.
De cantu si pensat custu impestamentu nou est partiu de calencunu discienti, aici parit chi nerit s’idadi de is positivus, cumprendius a pustis chi s’Ats at fatu 550 temponis su 3 e su 4 de làmpadas.
“Po bona sorti nemus de is impestaus est a intru de is spidalis: funt massimamenti piciocus giovunus foras de unu chi non si fut possiu vacinai”, at acrariu su cumissariu Antoni Monni. Su matessi cumissariu at chistionau po totu is piciocus chi facant is cosas comenti si depint fairi e cumbidendudeddusu a fairi su vacinu in pressi po cicai de frimai sa pesta.
“Chi totus teneus respetu de is regulas sa pesta da binceus in cuindixi dis e non dda feus bessiri de Aritzo, at sighiu a nai Monni, sa cida chi benit is operadoris de s’Ats ant a torrai a fairi su tamponi a cussus chi s’agatant incungiaus in domu e sa situatzioni at essi prus crara po totus. Su 15 de custu mesi eus a sciri chi ndi tirai is regulas chi eus donau o a dd’as sighiri ancora. Feti custu si podit fairi po ndi bessiri a lestru e torrai a biviri comenti in s’orrestu de sa Sardigna”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Aritzo
