A s’idadi de norant’annus est mortu, in Florida, unu de is testimongius de cussa chi benit contada comenti una de is impresas prus mannas de candu s’agatat s’omini: Michael Collins, unu de is tres chi fut in pissu de s’Apollo 11 chi in su 1969 est erribau in sa Luna. A diferentzia de is atrus dus, Aldrin e Armstrong, no at postu pei in foras. Una curiosidadi est ca custus tres furint fedalis de sa leva 1930.

Sa nova trista de sa morti de Collins est stetia donada de sa familia cun d’una nota: “Cun dolu mannu feus sciri ca su babbu e nannai nostu est mortu oi, fut malaidu de cancuru e at gherrau cun dignidadi manna cun sa maladia comenti at sempiri fatu in sa vida sua. Nosi mancat giai meda”.

Collins fut nasciu in Roma, aunia su babbu s’agataiat ca trabagliaiat, comenti de militari, in s’ambasciada americana. Candu at frecuentau s’academia militari de West Point est diventau pilota de aparechius e teniat candu dd’ant pigau in sa NASA, comenti astronauta, prus de 4200 oras in su celu. A innanti de diventai astronauta si fut laureau in sa United States Military Academy e de inigui fut intrau in s’aeronautica de is Stadus Unidus po pilotai is F-86 Sabre in sa basi de Chambley-Bussieres.

Collins at bolau in s’universu po duas bortas: sa prima cun sa missioni Gemini 10 e sa de duas, cussa prus famada, cun Apollo 11. De custa giai scieus totu ma cussa de Gemini 10 puru est de importu mannu. In custa missioni, issu paris a s’atru pilota chi si lamaiat John Young, furint bessius a un’artaria in pissu de sa Terra sapntosa de averas chi mai nemus iat resessidu: cuasi 765 chilometrus!

Est a nai ca Collins fut unu de is binticuatr’ominis chi ant bolau in sa Luna, su de cuatru a fairi una passillada spatziali e su primu a ddu airi fatu prus de una borta.

De cussus tres ominis chi funt bessius in sa Luna imoi s’agatat feti Buzz Aldrin, chi at lompiu is 91 annus in su mesi de gennargiu passau, Armstrong invecias est mortu in su 2012.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto: https://it.wikipedia.org/wiki/Michael_Collins_(astronauta)#/media/File:Michael_Collins_(S69-31742,_restoration)_(cropped).jpg