“Apu votau sa fiducia a su guvernu su 19 de gennargiu e apu sempri sustenniu su presidenti Conte. Candu m’ant pediu de intrai in custa truma noa, apu nau ca giai poita pensu ca imoi tocat a ponni Conte in is cunditzionis de fairi un’atru guvernu po sighiri a trabagliai beni e cun d’una magiorantzia allonghiada finas a Italia Viva”. Ddu at nau Gianni Marilotti unu de is dexi “Responsabilis” de su grupu nou “Europeisti-Maie-Cd”, nasciu in su Senau. Marilotti, eligiu in Sardigna cun su M5S, nd’est bessiu una priga de mesis a oi po intrai in su grupu de is Autonomias. Imoi s’intrada in si Responsabilis. “Castiendu is numurus, sciu giai, ca non cambiat nudda – at sighiu a nai su senadori – ma podit essiri un’incumentzu po ponni paris atra genti. Is numurus, soi seguru, ant a erribai”. At spiegau beni puru poita est intrau in custu grupu: “Connoscia is morrungius de calencunu de Forza Italia e, finas in s’area de centru po unu centrudresta chi est cumandau tropu de sa Lega e apu intendiu su progetu de Conte. A sa fini sa senadora Lonardo no est intrada e, sigomenti po fairi unu grupu serbint dexi parlamentaris, m’ant pediu de intrai e apu decidiu de dis donai una manu de agiudu”.
Sighint a bessiri de Mattarella, in s’interi, is delegatzionis de is partidus. Eriseru, est a nai funt bessius sa presidenti de su Senau e su presidenti de sa Camera. Oi, a pusti prangiu, s’at a presentai indeanti de su Presidenti is grupus de su partidu democratigu e finas cussus Italia Viva. Propriu custus urtimus funt castiaus cun atentzioni manna po cumprendiri eita ant a fairi. Oi, de seguru, no ant a fairi perunu nomini ma sa positzioni de su partida at essi sempiri sa matessi cosa de cussu chi ant nau in Parlamentu. Foras de cussu de Conte si faint is nominis de Di Maio e Gentiloni ma po is Steddaus e su Partidu Democratigu balit feti cussu de Giusepu Conte.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto:https://it.wikipedia.org/wiki/Palazzo_del_Quirinale#/media/File:Quirinale_palazzo_e_obelisco_con_dioscuri_Roma.jpg
