“Cumprendu sa volontadi de Regionis comenti sa Sardigna chi cicat de poderai bascius is numurus de sa pesta, e, a dda nai totu a fairi unu tamponi po sa genti chi erribat in s’Isula podit essiri un’agiudu, ma atentzioni, no est una garantzia”. A nai custus fueddus in televisioni, in Agorà, est Luca Richeldi, pneumologo in su Policlinico Gemelli de Roma chi est finas unu de su Comitato Tecnico Scientifico.

Chistionendu, in segus, de su Dpcm nou Richeldi at nau ca tra scentziaus de totu s’Europa est chiestionendusì de s’oportunidadi de unu incungiamentu comenti cussu de ocannu passau o chi est megliu una serrada a zonas. “sa partida prus importanti de totus est cussa chi nosi seus gioghendu cun is vacinus, a dogna manera”, at acabau de nai su dotori.

In su fratempus eriseru in Sardigna, chi de eriseru est in zona bianca, eus tentu corantacincu impestaus nous e otu mortus. Sa percentuali est calada de su 3% a su 0,7%.

Custus funt is numurus de su bulletinu de eriseru, prima dì de martzu: “De ocannu passau a imoi eus tentu 41.236 impestaus de Covid-19, in pissu de 768.303 tamponis fatus e s’atra dì fendu 6.514 tamponis funt bessius a campu atrus corantacincu impestaus. Is mortus nous funt otu, e in totu, sempiri de ocannu passau, bessint a 1.166. Sa genti chi s’agatat in is ispidalis est in numuru de 210 e de custus 19 funt in terapia intensiva. Is personis, invecias, chi funt incungiadas in domu bessint a 12.576 e is sanaus, cun is otantaseti de eriseru, bessint a 27.045.

Totu is impestaus funt aici dividius in su territoriu: 9.814 in sa citadi metropolitana de Casteddu, 6.602 in su Sud Sardigna, 3.481 in Aristanis e provincia, 8.184 in sa provincia de Nugoro e 13.155 in cussa de Tatari.

Imoi tocat a poderai e a non fairi sciollorius ca zona bianca non bolit nai a fairi totu cussu chi si bolit, ma antzis tocat a donai finas prus crobba de a innantis.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

Foto:https://ecfr.eu/rome/article/sette_lezioni_preliminari_del_coronavirus/