Chi in Casteddu fueddas de unu Gigi, totus pensant a su Gigi prus mannu chi apat postu pei in Sardigna: Riva. Ma, po chini at sempiri sighiu is contus de sa scuadra de su Casteddu, s’agatat un’atru Gigi bofiu beni meda de is tifosus: Piras. Ddi minesciat un’atra carriera a Piras, ca forsis at tentu sa sorti mala de giogai in d’unu Casteddu pagu forti chi faiat s’artzia e cala intru de sa Serie A e sa Serie B. Difatis, su “goleador” nasciu in Selargius su 22 de mesi de talamini de su 1954, at bestiu sa maglia orrubia e asula po set’annus in Serie A e po atrus seti in Serie B.

At cumentzau gioghendu in su Casteddu de a pustis su scudetu. Sa sociedadi, tandu, at faddiu scioberus meda e tropu manna fut, po giogadoris medas, s’eredidadi de cussus chi iant fatu allirgai totu sa regioni. Ma finas in totu custu Piras ce dd’at fata a si pigai unu biculu de storia. Is primus annus de serie A po Gigi non funt andau beni, pagas partidas e ancora prus pagus gol. Candu su Casteddu ci calat in Serie B po Piras cambiat totu, ca est stetiu un de is pagus a abarrai in Sardigna. Po custu est unu de cussus chi cumandaiat de prus in campu e foras puru. Lastima manna ca funt pagas is soddisfatzionis chi si pigat cun cussa maglia chi intendiat in su coru: una borta est erribau a pustis de cincu scuadras e un’atra borta a pustis noi. Funt custus is arresurtaus meglius de su bomber selarginu.

At giogau cun su Casteddu in totu 320 partidas segnendu 87 gol (132 partidas in Serie A con 31 gol e 188 partidas in Serie B cun 56 gol).

De arregodai sa prima partida in Serie A in su 1973-74 candu giogat contras de sa Fiorentina e fait su gol po binciri. Cun su Casteddu giogat s’urtimu campionau in Serie B in su 1987 e acabat de giogai s’annu infatu cun su La Palma, scuadra casteddaia chi agiudat a ci bessiri in Serie C2.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://storiedicalcio.altervista.org/blog/luigi-piras-lerede-di-rombo-di-tuono.html