In s’ierru fait frius e in s’istadi calori. Parteus de custa seguresa! Dapoi ci funt cussus chi dd’agradat s’unu o s’atru, non podeus scioberai e nosi pigaus cussu chi erribat, comenti totu is annus de candu nos agataus. Ma, po chini bivit meglius in s’ierru cussas de oi e de cras ant essi dis de inferru. Aspetaosì calori e ancora calori e chi podeis bageosindi a mari e infriscaosì in s’abba o, meglius ancora, sonumancu po chini scrit, iat essi a si ponni a suta una mata de iligi, ca non traigit mai. Po cussu chi fait sciri Meteo.it, su calori at a fairi de meri in cuasi totu s’Isula, de Casteddu a su Sulcis e de su Campidanu de mesu a is biddas in su centru de sa Sardigna. Is gradus ant a bessiri, in calencunu logu, finas a 39, ma in su mesi de triulas est un’arregula, e forsis non tocat a s’arriolai prus de cussu chi si depit.
In s’ierru, certu, bastat a s’imboddiai e su frius est bintu, imoi a si spogliai totu non fait e po cussu tocat a binciri su calori meda in manera abista. Sa prima manera est cussa de cicai de non bessiri in is oras prus caglientis, ma chini e chi siat chi si fait unu giru at a biri ca sa genti s’abarrat in domu a i cussas oras. Forsis est prus abista de cussu chi nosi bolint fairi creiri! Un’atra arregula manna, chi donant is espertus, est cussa de bufai abba meda po cicai de s’infriscai su cropus. Papai birdura e fruta cun tzucuru pagu est un’atra arregula chi balit, ma a bortas non fait ca seus totu pigaus de atrus milli arriolus e ci betaus a cropus sa prima cosa chi bieus. S’arregula prus manna est, a dogna manera, cussa de tenni passientzia manna e a castiai su benidori cun prus fidi: comenti ci bessit su mesi de triulas totu at essi in calada po is amantiosus de su friscu… ma non si chesceis, a pustis, po su frius, ca tanti est de sempiri chi andat de aici!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.bergamonews.it/2018/09/17/settimana-allinsegna-del-sole-del-caldo/291218/
