In Italia calas su Rt e s’incidentzia calat, po sa prima borta de su mesi de Santu Aine passau, a suts de is centus impestaus in pissu de dogna centumila abitantis. Est una bella nova, una de cussas chi fustis aspetendu de tempus meda.
Sa Sardigna, sa terra nosta, cun su 0,7, est sa regioni italiana cun su Rt prus basciu de totus. Est cussu chi si ligit de is numurus chi dogna cida donat su ministeru de sa saludi, chi at a serbiri po nosi fairi cambiai colori de lunis: allirgaus su coru, de zona colori de arangiu intraus in zona groga finas chi teneus numurus de zona arba.
Po cussu chi cuncernit is numurus de s’Italia, torrat a calai su Rt, imoi est a 0,86 e sa cida passada fu a su 0,89. De importu mannu est ca is impestaus calant a suta de is centu in pissus de is centumila abitantis, est a nai ca seus a norantases e sa cida passada fustis a centubintitres. De tres cidas mancu una regioni est a erriscu mannu, feti cuatru regionis, sa Calabria, sa Lombardia, sa Toscana e s’Umbria, tenint calencunu problema in prus, ma, po chini fait custus studius, no erriscant nudda po is cidas chi benint.
Atra nova galana e de importu est su numuru de is Regionis e de is Provincias autonamas chi tenint prus logu in is terapias intensivas e in is atrus aposentus.
Eriseru, su bulletinu regionali nos at fatu sciri ca is impestaus nous funt 72 chi faint pesai a 55.933 in totu, de su mesi de martu de su 2020. Eus tentu unu mortu puru e in totu ndi eus tentu 1428.
Is impestaus si funt agataus in numuru de 14.623 in sa citadi metropolitana de Casteddu, 8.488 in su Sud Sardigna, 5046 in Aristanis e provincia, 10.788 in Nugoro e provincia e 16.998 in Tatari e provincia.
Forsis custa borta ndi seus bessendu de averas, de is numurus chi eus ligiu est custa sa spera de totus, ca imois seus aspetendu de tempus meda.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.regione.sardegna.it/j/v/2568?s=423276&v=2&c=94255&t=1
