Est mortu eriseru a merì, in Roma, po mori de su Covid, Claudiu Sorrentino, atori, presentadori in televisioni, chi, de candu fut pipieddu at donau sa bogi a atori famaus meda de Holliwood, de Mel Gibson a John Travolta finas a erribai a Bruce Willis. Fut fradi de un’atra chi faiat sa matessi arti: Liliana Sorrentino. Fut nasciu in Roma su 18 de triulas de su 1945 e iat cumentzau giai de pipiu a donai sa bogi sua a genti chi est intrada in is domus de totus comenti Ron Howard, su Richie Cunningham de “Happy Days”. A Bruce Willis ddu at fatu chistionia in italianu in is film prus famaus de “Die Hard – Duri a morire” a “Die Hard – Vivere o morire” e galu “Die Hard – Un giorno per morire”. Cun Sylvester Stallone invecias in “Cop Land” e cun un’atru atori che Willem Dafoe in “L’ultima Tentazione di Cristo”. De arregodai finas sa bogi sua in “Love Story” candu at dopiau Ryan O’Neal. Chini s’est pesau cun pagus canalis in sa televisioni non si nd’at a podiri scaresciri cussa bogi!
Atrus atoris chi ant chistionau cun sa bogi sua funt tra is prus mannus chi si siant agataus: Jeff Bridges, Mickey Rourke, Geoffrey Rush, Gérard Depardieu, Daniel Day-Lewis e Russell Crowe. In is annus setanta fut sa bogi de Topolino puru e in is annus otanta, invecias, cun su biadu de Fabritzio Frizzi iat trabagliau in Tandem, una trasmissioni chi fut in Rai Due.
Intru de su 1995 e su 2000 est stetiu at trabagliau in s’arradiu puru, a innantis in RDS e a pustis in Radio 101, fendu “I suoni del cinema” chi s’acapiaiat beni cun s’arti sua.
Carriera manna sa sua e premius ateretantis po su cinema, su tiatru e sa televisioni. Impignus ddus tenait finas in su sociali e, paris a atrus, iat fatu nasciri su sotziu “Segretario sociale della Rai”. S’interru, ancora non si scit candu, at essi feti po sa genti prus strinta a Sorrentino.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.rsi.ch/news/vita-quotidiana/stragente/%C3%88-morto-Claudio-Sorrentino-13835467.html
