“Oi is ministrus de su Turismu si funt atobiaus, e custu est unu de is primus atobius de s apresidenza italiana de su G20. Prus che a totu fut un’atobiu formali. Su mundu bolit benni in Italia, sa pesta nos at custrintu a nosi serrai, ma s’Italia est bronta a torrai a donai su benennidus a totu s’orrestu de su mundu”. Ddu at nau su presidenti de su Guvernu italianu Mariu Draghi chistionendu cun is giornalistas in pissu de su Trurismu de su G20.
“Non tengiu peruna duda ca su turismu, in Italia, at a torrai prus forti de sempiri”, at sighiu a nai Draghi, “nosu depeus donai regulas craras e facilis po fairi benni is strangius in seguresa po totus. De sa metadi de custu mesi at essi prontu su Green pass de s’Europa. In su fratempus su guvernu italianu at aprontau unu pass birdi po s’Italia, chi at cumentzai a serbiri custu mesi e totu”.
Intantis, aspetendu de torrai a oberri totu s’orrestu, su Presidenti at impromintiu agiudus a chini s’arriolat de su turismu: “Is montis nostus, su mari, is citadis funt torrendu a oberri. Calencuna parti est distinada a torrai prus pitica, ma atrus, invecias a cresciri, e deu non tengiu peruna duda chi su Turismu at a essiri prus forti de a innantis. Imoi su guvernu tenit gana de donai una manu de agiudu a s’industria turistica chi at sunfriu meda in custus mesis, aunia fut totu serrau e, aciungiu, ca s’industria turistica est de un’importu mannu in su Pnnr nostu”.
“Su G20 e is diretivas po su benidori po su Turismu funt su cumentzu po torrai a comenti fustis in totu su mundu”, is atrus fueddus de Draghi.
Imoi tocat a aspetai feti chi sa genti bengiat vacinada totu e chi si torrit a partiri ca sa genti est orroscia de totu e, massimamenti, tenit famini. Su scaddu de s’istadi passada spereus chi apat imparau calencuna cosa: ocannu viagiaus in seguresa!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.governo.it/it/articolo/dichiarazione-del-presidente-del-consiglio-mario-draghi-sulla-missione-di-assistenza
