Dogna dì publicaus una nova in custa pagina e a preferentzia scioberaus sempiri cosas lebias, ca tanti giai nosi bastant is penas e is doloris de sa vida. Cicaus sempiri de chistionai, chena brigas, de politiga, de sanidadi, de sport e de crosidadis. Ma candu sussedint mortis comenti cussa cussa de unu piciocu de seighi annus non ce dda feus a abarrai citius.
Parteus de unu pensamentu, cumunu a totus: non si podit morri a cussa idadi candu si cumentzat a biri totu sa vida chi si tenit denanti e no est giustu, po unu babbu e una mamma, a nc’interrai unu figliu.
Nigola Melas, custu su nomini de su piciocheddu guasilesu, s’agataiat in domu de is biginus e chena chi nemus si nd’essit acatau at pigau su tratori insoru po si fairi unu giru in su sartu de Guasila. Segundu is primus indagus de is carabineris su giovunu at cumentzau a guidai e a pustis s’est agatau in d’una bessida legia e propriu innoi su tratori s’est furriau e Nigola s’est agatau a suta. A si nd’acatai de sa disaura funt stetius is meris de su tratori chi inderetura ant avertiu is carabineris e is dotoris, chi, a dolumannu, no ant possiu fairi nudda.
Paula Casula, sindaga de Guasila, at annuntziau po cras una dì de lutu po sa bidda e in sa pagina de Facebook at scritu: “Calechisiat fueddu est de tropu”.
Sa morti de unu piciocheddu lassat totus chena fueddus e sa tristura po sa comunidadi depit essiri manna, ma su primu pensamentu est po chini nos at lassau e po sa familia sua chi ant a depiri biviri cun custu dolori chi no at a passai mai ma si podit feti imparai a ddu aguantai. Una vida perdia, mascamente candu s’est biviu aici pagu, nosi fait perdiri fidi in su benidori. Ti pensaus Nigola, non ti connosciaus ma seus segurus chi in conca tenias progetus e cosas mannas de fairi.
Passientzia manna a totu sa comunidadi guasilesa, chi de sempiri est in su coru nostu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Guasila
