Est cussa de Casteddu sa provincia prus a mesura de pipiu po una classifica fata de su “Sole 24 ore” e intregada a sa calidadi de vida in totu is provincias. Sa cica fut po pipius, giovunus e antzianus. Sa capitali sarda erribat a innantis de totu is atras cun 546,3 puntus, comenti eus nau po cussu chi riguardat is pipius. Beni meda, sempiri po is pipieddus, finas Aristanis chi est sa tertza provincia, a pustis cussa de Udine. Is puntus pinnigaus de sa provincia oristanesa funt 517,5.
Po custa cica si funt pigaus doxi mesuras: pipius chi nascint, disponibilidadi de is asilus, pretziu de is asilus, mannaria de is domus, discientis po classi, agibilidadi de is scolas, scolas cun palestras o piscinas, giardinus in is scolas, birdi cun giogus, logus aunia si fait isport po is pipius e denuncias po disacatu a is pipius e totu.
Casteddu est una de is provincias cun su numuru prus artu de is dotoris po pipius e tenit una de is relatas meglius po su pretziu de is asilus cun su dinari acrariu de is familias. A dolu mannu is pipius a suta de is dexi annus funt calaus de su 14% in is urtimus cinc’annus, in su mentris est crescia sa percentuali de is becius de s’11%.
Sa citadi de Casteddu, chi in sa classifica generali est sa de noi, est prima po sa partecipatzioni a is cursus de formatzioni.
Calas a su de setantunu, in totu is centu e seti provincias, invecias po sa calidadi de sa vida po is giovunus. In custa classifica sa prima citadi sarda est Nugoro, chi s’agatat in trentunesima positzioni e sa prima in totu s’Italia est Ravenna. De castiai finas sa classifica po sa calidadi de vida po is prus becius: sa prima est sa provincia de Trento e Nugoro e Tatari funt in is primas cuindixi.
Nova bella e bona est ca sa provincia de Aristanis est una de is prus seguras de totu Italia, pagu est sa criminalidadi e sa genti est prus allirga.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Roberto Mura
