Est acabada cun d’unu puntu po unu sa partida de eriseru in su Sardegna Arena cun sa Fiorentina. Unu puntu chi at giuau a totus e duas is scuadras: sa Fiorentina est sarva e a su Casteddu nde ddi bastat feti unu de fairi in duas partidas, ma finas chi no ndi fait s’at a sarvai ca in s’urtimu dominigu de campionau ddu est Torino-Benevento, aunia s’at a decidiri de averas chini at a fairi cumpangiua a su Parma e a su Crotone chi funt giai in serie B de tempus meda. Anocra non si podit festai, ma su prus est fatu.

A dda nai totu no est unu meraculu cussu de s’allenadori Semplici, lamau in su mesi de friargiu a su postu de Di Francesco, candu totu pariat nieddu. Est sa cultura de su trabagliu chi at bintu, su trabagliu fatu de un’omini chi est de pagus fueddus, ma sempiri cun atentzioni manna po cussu chi sussedit in campu.

Sa partida de eriseru non dd’ant giogada né su Casteddu e nemancu sa Fiorentina, sussedit bortas meda in su giogu de su fubal, candu a totus andat beni su paregiu s’aspetat feti s’acabu e s’andat a innanti. No est mancu giustu a nai ca si funt postus de acordiu, est una cosa chi sussedit sempiri e chini at giogau a bocia ddu scit: dus ferius est meglius de unu mortu!

Imoi tocat a aprontai su campionau de ocannu chi benit, ma seus segurus chi Giulini est de sa parti giusta e at cumprendiu totu cussu chi non depit torrai a fairi. S’at a partiri beni feti cun Semplici ancora in panchina, si ddu minescit, po cussu chi at fatu, s’allenadori toscanu.

Calencunu giogadori at a erribai e calencun’atru si nd’at andai, custu est seguru. Chini erribat depit sempiri cumprendiri ca non giogat feti po una citadi, ma giogat po una terr chi tenit abisongiu de s’amostai a s’orrestu de su munud, e po comenti est sighiu, su fubal, est unu de is “media” prus mannus.

Imoi conca a sa partida de dominigu cun su Milan, po festai de s’essiri sarvaus candu pariat feti unu bisu.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.youtube.com/watch?v=CYM8jFxk-7k