In su mentris chi sa Sardigna, de una cida, est in zona bianca e bolit diventai zona birdi europea, gratzias a is numurus sempiri meglius in pissu de sa pesta de su Covid, sa bidda de Aritzo, invecias, est custrinta a serrai totu po mori de genti meda impestada.
Su comissariu, chi fait sa parti de sindigu, Antoni Monni at decidiu de firmai unu cumandu po serrai, sonumancu finas a su 15 de làmpadas, is bar, ristorantis, mercaus, scolas e campusantu. Su Cumunu abarrat obertu feti po chini non ddi podit fairi de mancu, aici comenti oberint is butegas de cosa de papai, is edicolas e sa potecaria.
In prus a sa genti benit arrecumandau s’umperu sempiri de sa mascherina e de abarrai in domu. Po s’ora in sa bidda barbaricina, chi fait milli e trexentus abitantis, funt, prus o mancu, una corantina is impestaus.
Abarrant bonus is numurus in s’orrestu de sa Sardigna. In s’urtimu bulletinu regionali si fueddat de trintunu impestaus nous e unu mortu, ma sa nova bona est ca funt sempiri prus pagus cussus chi intrant in is spidalis.
Po imoi funt 56.877 totu is impestaus, de friargiu de ocannu passau, e is mortus bessint a 1.473, otu funt in terapia intensiva e 110 in is atrus aposentus de is spidalis. Cussus chi s’agatant incungiaus in domu funt 12.359 e is sanaus in totu, sempiri de su cumentzu de sa pesta, funt 42.927.
Totus is impestaus sardus funt aici dividius in s’Isula: 14.833 in sa citadi metropolitana de Casteddu, 8.659 in su Sud Sardigna, 5.161 in sa provincia de Aristanis, 10.922 in cussa de Nugoro e 17.238 in sa provincia de Tatari.
Sighit beni sa vacinatzioni, finas chi cun calencunu strobu ca funt manchendu is vacinus, massimamenti de candu s’est obertu a is giovunus. Figliuolo at assegurau ca po su mesi de triulas totu is sardus ant airi fatu sonumancu su primu vacinu. Teneus fidi!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.borghiautenticiditalia.it/borgo/aritzo
