“Deu cun Fiorello ddu scieus ca funt tempus dificilis meda: depeus cicai de fairi torrai is setantacincus paginas de s’acordiu po su coronavirus cun su Festival de Sanremo de fairi in televisioni. In domu, chini ddu at a castiai, depint tenni su prageri de si spassiai e de non pensai a nudd’atru. Teneus su doveri mannu de donai cincu dis de allirghia. Sa spera mia est chi de su Festival de ocannu si possat cumentzai a torrai a nasciri”. Non feti su Sanremo de is tamponis e de is faciolas, de is zonas orrubias e de su gel po is manus, Amadeus est cichendu de fairi unu Sanremo chi siat comenti dogn’annu in tempus chi non funt normalis. Si chistionat de is istrangius de cumbidai e su bisu est a tenni Adrianu Celentano paris a Orrobertu Benigni: “Mi iat fairi prageri chi arrespundant ca giai. Funt sa storia de su cinema, de su tiatru e de sa musica. A ddu tenni paris iat essi un’arregalu mannu de averas po su Festival” Amadeus non narat de prus, ma si fait cumprendiri ca Benigni iat a benni finas chena de Celentano, o sonumancu s’est trabagliendu aici puru.

Cun Amadeus in pissu de palcu, po ddu agiudai, ddu ant essi po unu merì a cadunu Naomi Campbell, Elodie e Matilda De Angelis. “Teneus calencuna cosa in conca po su cenarba e su sabudu, una de custas est Ornella Vanoni, chi nos at giai nau ca eja, ma deu non dda ia bolli feti po cantai. Seus trabagliendu po dda poderai de prus in pissu de palcu”, sighit a nai Amadeus. Intru de is istrangius ddu eus agatai de seguru is Negramaro et Alisandra Amoroso, si chistionat de Loredana Bertè, e portas obertas po Jovanotti (“Chi bolit benni non depit mancu tocai sa porta”, is fueddus de Amadeus).

E chi a calencunu de is cantantis ddi picigat su Covid ? “Nce ddu bogaus de su cuncursu, non si podit fairi atru”. E chi, invecias at essi Amadeus a si impestai ? “Dd’apu giai nau un’atra borta po fairi crisai a Fiorello e ddu torru a nai: chi m’impestu deu at essi Fiorello a ddu presentai”. Fiorello a-i custu puntu narat, po brulla, ca “a sa sola non ce dda ia fairi, po custu, Carrulu Conti, Fabiu Fazio, Alisandru Greco e Marzullo abarrai prontus ca bosi muto”.

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.ciakclub.it/2020/01/17/sanremo-2020-amadeus-tenta-scusarsi-le-continue-gaffe/