Chini si ddu arregodat Oreste Lamagni? Candu ancora is numurus po is giogadoris baliant e ti donaiant una zona de su campu a Lamagni su numuru 2 non si nde ddu leaiat nemus. Corti, Lamagni, Longobucco non fut famada comenti Bacigalupo, Ballarin, Maroso, ma po is tifosus sardus funt nominis chi andant sempiri arregodaus.
Est nasciu in sa provincia de Mantova, in Marcaria, su 23 de arbili de su 1952. Erribat a su Casteddu a pustis su scudetu de su 1970 e teniat 18 annus candu at postu pei in s’Isula. In su Casteddu at giogau po cuindixi campionaus e in is urtimus annus fut finas su capitanu. Su Casteddu, candu ancora fut giovuneddu, ddu at mandau a si fairi is ossus a innantis in Empoli e a pustis in Sassari. Ma una borta torrau no at prus lassau sa scuadra de sa capitali sarda: a s’acabu de sa carriera, in su 1985 s’ant a contai 293 partidas giogadas cun tres gol, unu in serie A cun s’Ascoli e atrus dus in Serie B. Lamagni non depiat pensai a segnai, ma in dogna manera depiat donai croba a is giogadoris chi ddu depiant fairi po is atras scuadras. De sempiri benit arregodau comenti unu de is prus bravus difensoris de is annus setanta e in Casteddu at lassau arregodus durcis. Sempiri citiu, mai unu morrungiu est arregodau de tifosus e de is cumpangius comenti unu chi in partida donaiat totu cussu chi teniat e sa maglia a s’acabu fut sempiri infusta de sudori.
Su seti de Sant’Andria de su 1971 at giogau sa prima partida in Serie A, intrendu contras de su Napoli a su postu de Mario Martiradonna, agiudendu is cumpangius a binciri po 2-1. In cuss’annada iat airi giogau feti un’atra borta, ma in segus giai at tentu tempus de bistiri cussa maglia chi intendiat in su coru.
At smitiu de giogai in su 1985, cun Ulivieri allenadori, e inderetura at cumentzau a fairi s’allenadori po piciocheddus, massimamenti in Emilia po su Parma e sa Reggiana.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.laststicker.com/cards/panini_calciatori_1981-1982/60/
