Una intrat, Aglientu, chi s’agatat in Gaddura e una ndi bessit, Teulada, bidda de su Surcis. Est custu su chi nd’est beniu a pigliu po is Bandelas asulas sardas po su 2021. In totu funt cuindixi is intradas noas de sa Fee chi est sa Foundation for Environmental Educatio. Crescit a duxentus e unu, ocannu, is logus de mari, in su 2020 funt 195, chi paris a otantacincu portus turisticus (setantacincu ocannu passau) ant a podiri umperai sa Bandela in su 2021.

Comenti in su 2020 sa regioni chi tenit prus logus, trintadus in totu, est sa Liguria, sa segunda, cun dixianoi Bandelas, est sa Campania chi at giumpau sa Toscana, chi nd’at perdiu tres de Bandelas, fendudedda liscinai in sa tertza positzioni a su costau de sa Puglia.

In totu ocannu funt cuatruxentus e sexi is bandelas, noi in prus de su 2020 chi funt cuasi su 10% de cussas premiadas in totu su mundu, faint sciri de su Fee, nendu puru ca is Bandelas in logus de lagus calant poita dus ndi funt bessius.

S’arreconoscimentu benit donau cun cuasi sempiri is proprias regulas chi andant de su mari a totu is servitzius.

A is peis de sa classifica agataus is Marche cun sexi bandelas, sa Calabria cun cuindixi, sa Sardigna cun catodixi. Bessint a trexi s’Abruzzo, a undixi su Lazio. A dexi agataus, invecias, su Trentino Alto Adige acumpangiau de sa Sicilia, a noi su Veneto, a seti s’Emilia a cincu sa Basilicata, a dus su Piemonti e su Friuli e po urtimas, cun d’una bandela, su Molise e sa Lombardia.

Is catodixi biddas sardas premiadas funt: Badesi, Casteddu Sardu, Sorso, Tatari, Santa Teresa di Gallura, Aglientu, Trinità d’Agultu e Vignola, La Maddalena e Palau in sa provincia de Tatari, in segus teneus Aristanis, e duncas in Ogliastra Tortolì cun Barisardo, Cuartu po sa citadi metropolitana de Casteddu e Sant’Antiogu in su Surcis.

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: http://www.bandierablu.org/common/index.asp