Abarrant ancora bascius is numurus de is impestaus de su Coronavirus in Sardigna, finas chi funt de prus de cussus de sa dì innanti. Eriseru, po cussu chi c’est scritu in su bulletinu de s’Unidadi de crisi regionali, furint otantatres chi ant fatu pesai su numuru, de su cumentzu de sa pesta in su mesi de martzu de ocannu passau, a 55.765. A dolumannu eus tentu atrus cuatru mortus, imoi funt 1.442 in totu. Is tamponis fatus funt spantosus a beru: 1.224.781 e sa percentuali de positivus est calada a 1.7.

Funt coranta is malaidus chi s’agatant in terapia intensiva e 274 in is atrus aposentus. Cussus, invecias, incungiaus in domu funt 14.916 e is sanaus, sempiri a partiri de martzu 2020, funt bessius a 39.113.

Is 55.765 impestaus funt aici dividius in su territoriu: 14.585 in sa citadi metropolita de Casteddu, 8.440 in sa provincia de su Sud Sardigna, 5035 in cussa de Aristanis, 10.571 in provincia de Nugoro e 16.954 in cussa de Tatari.

Chi si chistionat de virus tocat a chistionai, a dogna manera finas de cussu chi est fendusì cun is vacinus. In Sardigna, de gennargiu de ocannu, funt 606.007 is vacinus fatus chi funt s’80,8% de is vacinus chi funt a dispositzioni de sa Regioni. Sa media de s’orrestu de s’Italia est de s’89,4%; feti sa Sicilia, cun s’80,5%, est peus de nosu! Ddu narat su Guvernu cun su bulletinu de eriseru a mengianu. In sa dì de lunis is vacinus fatus in s’Isula sarda funt 9.650.

De totu is vacinus fatus in Sardigna su numuru prus mannu est cussu po sa genti chi tenit prus de otant’annus: 159.117. A sa genti chi andat de is setanta a is setantanoi annus nd’ant fatu 88.032, a chini tenit de sessanta a sessantanoi invecias 49.585. Cuasi norantatres mila cussus fatus a chini trabagliat in su mundu de sa sanidadi e 118.455 a chini sunfrit de atras maladias. Sighint is professoris e totu cussu chi trabagliant in su mundu de sa scola cun 23.535 e cussus chi tenint una divisa po nosi difendiri cun 11.393.

 

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto: https://www.regione.sardegna.it/j/v/2570?s=1&v=9&c=94253&na=1&n=8&c1=289&nodesc=1&ph=1