Sa Sardigna est sa regioni cun prus impestaus de coronavirus in sa cida chi andat de su su 26 de austu a su primu de cabidanni. Ddu narant is numurus de sa Fondazione Gimbe: 23,42 impestaus dogna centumila.

A palas de s’Isula s’agatant Emilia Romagna, Campania, Liguria e Lazio. Sa Fondazione Gimbe narat puru ca custus numurus depint essiri ligius pensendu ca in Sardigna, in cussas dis, fut prenu de genti strangia.

Galu, de is 26.754 impestaus finas a su primu de cabidanni, su 50,2% funt in tres regionis: Lombardia cun 7.082, Lazio cun 3.285, Emilia Romagna cun 3.061. S’orrestu, invecias, est dividiu intru de Veneto cun 2.460, Campania cun 2.292, Toscana cun 1.581, Piemonti cun 1.464, Sicilia cun 1.152, Puglia cun 860, Sardigna cun 837 e Liguria cun 560.

“Funt numurus – narat su presidenti de Gimbe, Ninu Cartabellotta – chi nos si faint sciri ca su virus est torrendu a picigai in sa natzioni nosta, e custu, a dolumannu, candu funt torrendu a oberri is scolas”.

 

Foto: www.ansa.it