Sa manifestada, in Roma, de su centru dresta totu paris, Lega, Fortza Italia e fradis de s’Italia – contras de su guvernu Conte, chi candu est stetia aprontada depiat biri sa presentzia feti de 300 personis, invecias s’est fata cun genti meda, e medas funt cussus chena peruna faciola in cara.
Chini at manifestau s’est ddu at fatu in via del Corso e nemus at arrespetau is mesuras de su Guvernu in pissu de su “distanziamento sociale”. Medas funt cussus chi si funt acostaus a Giorgia Meloni e Mateu Salvini po si fairi fotografias, finas chi is organizadoris ant cicau de cumbidai a totus a poderai su stesiamentu.
Non feti in Roma si funt atobiaus ma finas in atras setanta citadis, in Casteddu puru in su Bastioni de Saint-Remy. “Non sciu chini calit in is prassas a pustis de nosu e non arrespundu po atra genti. Nosu seus sa dresta. Cun is atrus partidus de s’alleantzia eus scioberau de manifestai in seguresa cichendu de arrespetai is mesuras”, at nau, chistionendu cun La Repubbplica, Giorgia Meloni. “Sa genti non ddi podit prus e is problemas funt meda prus mannu de cussus chi su Guvernu nosi contat”, at sighiu sa Meloni.
In pissu de is fueddus de Mattarella, chi at nau ca eriseru fut sa dì de totus, sa Meloni at fatu sciri de essiri de acordiu cun su presidenti de sa Repubblica.
Foto:https://www.adnkronos.com/fatti/politica/2020/06/02/giugno-centrodestra-piazza
roma_WYYpa2H2YJ7m7xWQ48Pw9K.html
