In su mentris chi s’aspetant is cumandus de Christian Solinas su Covid-19 sighit a si difundiri in is biddigeddas de sa Sardigna. Oi si iant depiri connosciri is arregulas noas de su guvernu, Conte no at chistionau de un’atru acorramentu e nemancu de una serrada, a innantis de s’ora, po is bar e is ristorantis, ma de seguru si iat depiri tenni sa mascheredda sempiri candu s’est foras de domu.
Eriseru atrus otant’otu impestaus e un’atru mortu in Torpè, custa borta. Est unu problema mannu po is biddas piticas aunia est prus dificili a biviri stesiaus unu de s’atru. In Ollolai si contant setanta impenstaus e sa scola abarrat serrada finas a su dexi de custu mesi. In Arzana puru, aunia s’aspetant is arresurtaus de is centubinti tamponis fatus de s’Usca, si pigant mesuras: non podit intrai genti meda in su cumunu e in is interrus non podint andai in prus de trinta.
Atrus impestaus nous in is biddas de Ilbono, Cardedu e Dorgali e in Nugoro duas classis de su liceu classicu Asproni abarrant in domu ca dus discientis funt impestaus. Atrus otu positivus ddus agataus in Assemini, unu in Santu Sparau e dus is Decimoputzu.
Foto: https://www.ilsole24ore.com/art/cinquecento-gara-rilevare-un-euro-case-ollolai–AERedPzE
