“Centu dis de fueddus, atobius cun is giorronalistas, inauguratzionis, ma po imoi s’atividadi de sa giunta comunali de Pàulu Truzzu non at fatu nudda de nudda”. Est custa sa curpa chi donant is consiglieris de s’opositzioni a su sindigu cun sa scuadra cosa sua. Po is consiglieris de is Progressisti, Pd, Sinistra per Cagliari e Progetto comune, cussu chi finas a s’ora at fatu sa giunta est feti su chi iat incumentzau sa giunta de Massimu Zedda. In su comunicau de is consiglieris si chistionat de is coranta milionis de euros po oberri is trabaglius de su Pon Citadi Metropolitane e de is trexi milionis po fairi torrai su bilanciu. Non feti custu ma si sighit cichendu sa presentada de is trabaglius de s’asilu de Sant’Elia abrugiau de su fogu, su ponti po sa genti e po is bicicretas in Santu Bartolomeu e is campus sportivus de sa scola in s’orruga de su Soli, ect…
In segus, su cominicau narat ca: “Non eus bistu grandu trabagliu in consigliu comunali, is consiglieris de Truzzu ant fatu biri ca de Casteddu non tenint idea manna. De totu cussu chi ant presentau tocat a s’arregodai su ‘Giardino degli angeli’ chi nd’at pigau criticas de ogna parti”. “A pustis tres mesis – si sighit – non eus ancora tentu modu de connosciri cussu chi s’at a fairi in is cinc’annus chi funt erribendu”.
