Su sindigu de Casteddu, Massimu Zedda, nd’at tirau sa delga a s’assessori a is trabaglius publicus Giuanni Chessa de su Partidu Sardu de Atzioni. Eriseru etotu, in su Consigliu comunali, ddu at annuntziau su sindigu casteddaiu, at decidiu de nce ddu bogai po s’acordiu chi c’est stetiu a livellu natzionali de su partidu de Chessa cun sa Lega. Zedda at chistionau po cuatru minutus e at spiegau is arregionis de su scioberu chi at fatu. Giuanni Chessa est unu de is prus chi sighint Christian Solinas, su seretariu de su Psd’Az. chi est serrendu s’acordiu cun Salvini.
Imoi in su cumunu de Casteddu eus a biri eita at a sucediri, difatis sa truma sardista est de cuatru consiglieris (Monia Matta, Gabriella Deidda, Aureliu Lai e Franciscu Stara), ma de pagu funt intraus finas unu de La Base (Linu Bistrussu) e un’atru de su Partidu de is sardus (Orrobertu Tramaloni). Chi totu paris si spostant cun sa minorantzia a Zedda iant a benniri a mancai is numurus poita: segi a segi iat essi su contu. Ma su sindigu non timit a nudda e castiat a su benidori chena peruna duda.
