De oi s’incumentzat a fairi in su seriu po su Casteddu. Torrat a partiri de Aritzo po sa cuarta borta de sighiu. Funt nous s’allenadori, Rolando Maran, e su diretori sportivu, Marcello Carli. Tocat a si ndi scaresciri coidendu s’urtimu campionau chi non at fatu allirgai meda is tifosus cun sa seguresa de abarrai in Serie A erribata feti cun s’urtima giorronada. Is giogadoris si funt agataus custu mengianu in Assemini e apustis su prangiu funt partius totus in Barbagia. Su primu allenamentu est oi a is cincu e mesu de merì. De cras, finas a dominigu, is allenamentus funt duas bortas a sa dî, una a is noi oras e mesu de mengianu e s’atra a is cincu. Apustis Aritzo su Casteddu at a sighiri a trabagliai prima in Assemini e in segus, comente de una pariga de annus a imoi, in Pejo in s’Alto Adige.

Is convocaus po Aritzo funt is portieris Cragno, Daga e Rafael; is difensoris Andreolli, Capuano, Faragò, Lykogiannys, Paja, Pisacane, Romagna e Srna; is centrucampistas  Barella, Caligara, Castro, Cigarini, Colombatto, Deiola, Dessena, Ionita e Padoin; is atacantis Farias, Han, Pavoletti e Sau.

 

 

 

Foto: cagliarinews24.com