Cinc’annus de galera po sa diretora de su ricoveru po becius “Residenza Famiglia” de Nugoro, Rosanna Serra, e su matessi a su presidenti de su sotziu chi ghiada sa strutura, Luisu Masala de Casteddu.
Funt custas is cundennas chi at decidiu sa Corti de Assise de su Tribunali de Nugoro, cumandada de Jorgi Cannas. Pusti seti oras sa giura popolari e is giuighis ant arreconnotu is curpas de totus a is dus po airi lassau de parti genti chi non podiat e po custu funt mortus Luigina Mele e Stelvio Giuliani. Non funt stetius cundennaus po sa morti de Nigola Granara.
Su pubricu ministeru, Jorgi Bocciarelli, iat pediu sa cundenna po Serra a cinc’annus e po Masala a seti.
In tribunali, po ascurtai sa sententzia, ddue funt is familias de is becius mortus e s’abogau de parti civili Nazarena Tiloca chi at nau: “Finalmenti ant fatu giustitzia”. S’indagu de sa Procura de Nugoro fut partia dus annus a imoi pusti calencuna segnalatzioni e in pissu a-i custas mortis.
