Est mortu sa noti passada, in s’ispidali Cardarelli de Napoli, aunia s’agatat de una pariga de dîs, Luisu Necco, giorronalista famadu, e faci connota de 90° minuto de sa Rai in is annus de is scudetus de su Napoli de Maradona. Iat airi fatu otantacuatr’annus in su mesi de maiu.
Un’orrugu de storia de su giorronalismu de sa Campania ma finas de s’Italia. Non trataiat feti de palloni ma connosciat meda beni s’archeologia puru: “L’occhio del Faraone” cun “Emigrante” funt dus de is programas chi faiat in sa televisioni. Luisu Necco at fatu po cinc’annus finas su consiglieri cumunalli in Napoli po su Pds, in is urtimus annus si fut intregau, paris a sa Prefetura, a progetus de legalidadi po is scolas.
“Cun Luisu Necco si nd’andat unu maistu de su giorronalismu napoletanu. ddu stiamiat e mi stimaiat e ddi bolia beni de sempiri finas candu naraiat cosas chi non pensaia. un’imbrassu a totu sa familia e a is giorronalistas. A nosu at abarrai s’arregodu de un’omini sabiu e balenti”. Custu est cussu chi at scritu su sindigu de Napoli Luisu De Magistris.
Foto: ilmattino.it
