Sighit in Tàtari  sa manifestatzione “Limba e libros in su Museu Sanna” incurada dae s’Isportellu Linguìsticu de sa Limba Sarda e Catalana, de su Servìtziu Limba  Sarda de s’Assessoradu Regionale a s’Istrutzione Pùblica.

 

Su de bator addòbios s’at a fàghere giòbia su 15 de maju, a sas chimbe e  mesa de borta de die, in sa sala romana de su Museu Natzionale “A. Sanna “ in carrera de Roma, pro sa presentada de su libru “S’Istrumpa” de Piero Frau.

 

“S’Istrumpa”, forma antiga de luta sarda, est unu manuale chi espressat s’amore pro custu isport particulare e pro su valore educativu e formativu chi tenet. S’intentu de su libru est fintzas cussu de defensare s’istrumpa, imparende·la a sos giòvanos. Su libru punnat a dare, a sos chi cherent connòschere e praticare s’istrumpa, règulas codificadas pro chi las imparent e ispàrghinent in sas iscolas de ogni òrdine e gradu, in sas palestras e in ogni àmbitu isportivu e sotziale.

Su libru est in duas limbas, in sardu e in italianu.

 

At abèrrere sa presentada Gabriella Gasperetti, diretora de su Museu, sighida dae Cristiano Becciu, funtzionàriu de su Servìtziu Limba  sarda. Giovanna Tuffu, de s’Isportellu regionale de sa limba sarda e catalana, at a moderare sa dibata. At a intervènnere Tonino Bussu, istudiosu de limba sarda e Micheli Ladu, de s’Isportellu linguìsticu regionale chi at bortadu su libru in sardu.

 

At a èssere presente s’autore de su libru Piero Frau.

 

Piero Frau est nàschidu e istat in Ollollai. Sende amantiosu de isport, s’apentat luego cun sa cultura fìsica e sos pesos, allenende·si in palestra paris cun s’amigu Franco Columbu, su chi est resurtadu unu de sos campiones prus mannos de su culturismu in su mundu. In Ollollai aberit sa palestra “Club Barbàgia”. Binchet paritzas garas a livellu regionale e natzionale. Est istadu sìndigu de Ollollai e como est presidente de sa Federatzione de s’Istrumpa.

 

Totu sas initziativas promòvidas in Tàtari dae su Servìtziu Limba Sarda de sa Regione, pro more de sa grandu collaboratzione cun su Ministèriu pro sos benee e sas atividades culturales, servint a valorizare sa limba  sarda e sas variedades alloglotas de Sardigna.

 

Seis totus invitados a bènnere giòbia 15 de maju a sas 17,30 a sa presentada de “S’Istrumpa”, su de bator addòbios de “Limba e libros in su Museu Sanna”.