Guglielmu Piras, su poeta de Sìnnia connóschidu pro sa bellesa de sos versos suos e pro sos prémios balanzados in sos cuncursos poéticos de importu in tota sa Sardigna in custos annos at bìnchidu finas in sa prosa, cun su romanzu Pitzinne’. Piras at àpidu su primu prémiu pro sos contados galu chene imprenta in limba sarda in sa prima editzione de su cuncursu literàriu de su Tennis club de Su Planu (Ceraxius), intregadu a Fernando Pilia: literadu, giornalista, archeólogu e operadore culturale.
Su romanzu de Guglielmu Piras est istadu calculadu “unu modellu noale e cumpridu de contadu longu in limba sarda ghiadu cun balentia in su modu de contare e cun connoschéntzia de s’istrumentu de sa limba”. In custa setzione –narrativa inedita la jamat su bandu in limba italiana- de su Prémiu litetàriu nou (a su prim’annu) b’at àpidu duos riconnoschimentos pro sos contos de Sandro Chiappori e Maria Bonaria Obino: a Chiappori pro Ddu tzerriànt Batociu, a Obino pro Sa mess’’e su trigu e s’incungia de s’arregorta.
In sas setziones italianas sos binchidores sun Giampietro Ibba cun su romanzu E poi.. Chiara lo sa e Walter Falgio cun sa chirca istórica Libro e Università nella Sardegna del Settecento. In s’ammentu de unu dolore chene nùmene pro aer pérdidu una fiza a s’edade de 18 annos, Giampietro Ibba – unu dutore de s’ispidale Brotzu de Casteddu – “resessit a nos dare”, at iscritu sa giuria, “una criassione literària digna de ammiru, finas in su disisperu de unu disacatu chi si fut pótidu isfrancare”.
A sa chirca de Walter Falgio, un’istudiosu pitzinnu, sa giuria at riconnotu un’impignu de seriedade e validoria: “S’autore est reséssidu a contare s’istajone culturale noa in sa Sardigna de su 1700, cun sa riforma de sas Universidades de Casteddu e Tàtari e su trabagliu de sos professores chi s’interessan de sa cultura nostra”.
In sa setzione de sos romanzos in italianu sa giuria at dadu una làude a Stefania De Michele, giornalista de Sardegna Uno, pro L’arcano minore- Eleonora d’Arborea fra mito e realtà. Finas pro su romanzu de custa contadora pitzinna sa giuria at impitadu peràulas de méritu distintu: “Su mistériu chi ammuntat una de sas figuras de pius bundu de s’istória sarda comintzat a isvanèssere. In custu trabagliu Eleonora benit pintada e contada pius comente fémina che comente guvernadora, duncas cun totu sas debbilesas puru e nde resultat una pessone chi chie lezet intendet a cultzu a isse”.
A parte sa literadura, su 4 de trìulas in sa festa de Su Planu, sos ammanizadores de su cuncursu an dadu àteros duos prémios ispeciales. Su primu a s’ammentu de Demétriu Ballicu, dutore de Seui amigu de Fernando Pilia e che isse amantiosu de sas prendas de sa tradissione sarda, chi at seberadu de fagher su dutore in bidda sua pro 40 annos, revudende àteros ingàrrigos. Demétriu Ballicu est autore de paritzos volùmenes chi s’isperat de torrare a imprentare, una die o s’àtera. A retirare sa targa est bénnida sa neta Stefània, fiza de Piero Ballicu, dutore isse puru, galu in atividade in su campu de sa chirca subra sos tumores.
Su segundu prémiu sa giuria l’at dadu a don Màriu Cugusi, su retore de Sant’Eulàlia chi sa disamistade de su pìscamu Mani at brivadu de sa cheja sua ma chi in cussa probania pro trint’annos at abbertu sa janna a sas àteras religiones puru, contivizende finas isgavos archeológicos chi nos azuan a cumprèndere mezus sos primos séculos de su cristianésimu in Casteddu.
Sa festa est istada ghiada dae Angélica Lai, subra su palcu sun pigados sos atores Carlo Porru, Stefània Deiana, Silvia Piludu e Federica Orrù, chi an retzitadu poesias e prosas sardas e italianas. Sa congruida est istada intregada a sa mùsica cun Marco Meloni e Federico Melis (pianoforte) e Giorgio Murtas (chitarra). Sos pitzinnos de sa Beat Generation (Carlo Porru retzitadore, Frank Blindblues chitarra e boghe, Avio Onnis percussione e Manuela Cara boghe) an dadu vida a un’ispetàculu de calidade primarza.
